राष्ट्रिय खेलकुद परिषदको फागुन २७ गते बसेको कार्यकारी समितिको बैठकले चैत २५ गते आठौँ राष्ट्रिय खेलकुद प्रतियोगिताको उदघाटन गर्ने प्रस्ताव राखेको छ । राखेपका सदस्यसचिव केशवकुमार विष्टको अध्यक्षतामा बसेको उक्त कार्यसमितिको बैठकले चैत २५ गते उद्घाटन र चैत ३० गते समापन गर्ने प्रस्ताव अघि सारेको हो । यसअघि राखेपले चैत २३ गते आठौँ राष्ट्रिय प्रतियोगिताको उदघाटन मितिको प्रस्ताव गरे पनि भौतिक पूर्वाधार सम्पन्न नहुँदा अर्को मिति सारणी गरिएको सदस्यसचिव विष्टले जानकारी गराएका छन् ।

अब युवा तथा खेलकुदमन्त्री जगतबहादुर सुनार (विश्वकर्मा) को अध्यक्षता केही दिनपछि बस्ने राष्ट्रिय खेलकुद परिषदको बोर्ड बैठकमा कार्यसमितिले गरेको प्रस्तावको छलफल हुनेछ । सोही बोर्ड बैठकले आठौँ राष्ट्रिय खेलकुद प्रतियोगिताको अन्तिम तथा औपचारिक मिति तोक्नेछ । परिषदको बोर्ड बैठक चैतको पहिलो साता बस्ने सदस्यसचिवले बताए ।

आठौँको आयोजनाका लागि अन्य सम्पूर्ण पूर्वाधारको कार्य सम्पन्न भइसके पनि नेपालगञ्ज रंगशालाको भीआईपी प्याराफिट सम्पन्न नभएका कारण आठौँको मिति सारणी भएको हो । भीआईपी प्याराफिटका लागि एकलट सामान आइसकेको छ भने दोस्रो लटको सामान नेपालको भन्सारमा पुगिसकेको छ ।

अहिले आठौँ राष्ट्रियका लागि प्रदेश छनोट भइरहेको छ । जसमा अहिलेसम्म २० खेलको छनोट सम्पन्न भइसकेको छ भने १५ खेलको छनोट हुन बाँकी छ । आठौँ राष्ट्रियमा ३५ खेल समावेश गरिएको छ । आठौँ राष्ट्रिय प्रदेश ५ को नेपालगञ्जलगायतका विभिन्न जिल्लामा आयोजना हुँदै छ ।