बंगलादेशको ढाकामा हुने प्रथम सार्क स्नुकर च्याम्पियनसिपका लागि खेलाडी छनोट चैत ११ गते सोमबारदेखि जमलस्थित साकुरा स्नुकर क्लबमा शुरु भएको छ ।

नेपाल विलियर्ड, पुल तथा स्नुकर संघले आयोजना गरेको छनोटमा गत शनिबार सम्पन्न प्रथम साकुरा राष्ट्रिय स्नुकर च्याम्पियनसिपमा शीर्ष ८ स्थान हात पर्ने र स्नुकर संघले निर्धारण गरेको शीर्ष ८ स्थानका गरी १६ खेलाडी सहभागी छन् ।

यी १६ खेलाडीबीच पहिले नकआउट आधारमा प्रतिस्पर्धा भइरहेको छ । नकआउटमा जित हात पार्ने ८ खेलाडीलाई दुई समूहमा विभाजन गरी लिग खेलाइनेछ । दुवै समूहको विजेताले ढाकामा जुलाई २१ देखि २७ तारिखसम्म हुने च्याम्पियनसिपका लागि छनोट हुनेछन् ।

पहिलो दिन सोमबार ४ खेल सम्पन्न भए । त्यसमा स्नुकर संघको वरीयतामा परेका ३ खेलाडीले जित हात पारे । रेगन श्रेष्ठले साकुरा स्नुकर च्याम्पियनसिपका उपाधि विजेता निर्माण बोगटीलाई ५–४, सुजेन शाहीले सञ्जय बज्राचार्यलाई ५–१, विकेश राईले मोती तामाङलाई ५–३ र अमन कार्कीले उदीप शाक्यलाई ५–१ को फ्रेममा पराजित गरे । विजयी ३ खेलाडीका साथै पराजित मोती संघको वरीयता प्राप्त खेलाडी हुन् ।