एपीएफका दीपेश धामी १५औँ कृष्णमोहन स्मृति राष्ट्रव्यापी खुला ब्याडमिन्टन प्रतियोगितामा विजय यात्रा जारी राख्दै सहभागी तीनै विधाको अन्तिम चारमा पुग्न सफल भएका छन् । दीपेशले पुरुष एकल, युगल र मिश्रित युगलमा सेमिफाइनलको यात्रा तय गरेका हुन् । पुरुष एकलमा एपीएफका गौतमसिंह कठायतलाई २१–१४, २१–८ ले पराजित गरेका धामीले पुरुष युगलमा विजित थापामगरसँग मिलेर एपीएफकै विशाल प्रधान र विमल श्रेष्ठको जोडीलाई २१–१३, २१– १९ ले पाखा लगाए । यस्तै, मिश्रित युगलतर्फ पनि पूजा श्रेष्ठसँग मिलेर धामीले जेष्ट ब्याडमिन्टन एकेडेमीका अखिल श्रेष्ठ र डिना पुनलाई २१–१७, २१–७ ले पराजित गर्दै सेमिफाइनलमा स्थान पक्का गरेका हुन् ।

यस्तै अन्तिम ४ मा प्रवेश गर्ने पुरुष एकलतर्फका अन्य खेलाडीमा सेनाका प्रफुल महर्जन, सिल्क ग्रुपका प्रिन्स दाहाल र पुलिसका जीवन आचार्य रहेका छन् । प्रफुलले एपीएफका सुदीप सेढाईंलाई २१–१८, २१ –११ ले, प्रिन्सले एपीएफका सुनील जोशीलाई २१–१५, २१–१९ ले तथा जीवनले एपीएफका साजनकृष्ण ताम्राकारलाई २१–१८, २१–१७ ले पराजित गरे ।

पुरुष युगलतर्फ पुलिसका दीपक बोहरा र जीवन आचार्यको जोडीले एपीएफका सुमन लिम्बू र जोसेफ अधिकारीको जोडीलाई २१–१२, २१–९ ले पाखा लगाउँदै सेमिफाइनलमा प्रवेश गरे । यस्तै, एपीएफका सुदीप सेढाईं र साजनकृष्ण ताम्राकारको जोडीले एपीएफकै सुनील जोशी र गौतमसिंह कठायतको जोडीलाई २१–१८, २१–१८ ले पराजित गर्दै फाइनल प्रवेशका लागि सेनाका प्रफुल महर्जन र सुरोज महर्जनको जोडीसँग प्रतिस्पर्धा गर्नेछन् । महर्जन जोडीले सिल्क ग्रुपका प्रिन्स दाहाल र एपीएफका नीरविक्रम देवकोटाको जोडीलाई २१–१५, २१– १६ ले पराजित गरे ।

मिश्रित युगलतर्फ एपीएफका गौतम कठायत र सुनैना मुखिया, सेनाका सुरोज महर्जन र अमिता गिरी तथा एपीएफका विजित थापामगर र शोभा गौचनको जोडी पनि सेमिफाइनलमा स्थान बनाउन सफल भए । कठायत र मुखियाको जोडीले सेनाका रुकेश महर्जन र रञ्जना भट्टको जोडीबाट वाकओभर प्राप्त गरे । यस्तै सुरोज र अमिता गिरीको जोडीले एपीएफका नीरविक्रम देवकोटा र भोजपुरकी सीता राईको जोडीमाथि २१–१९, २१–१३ को जित निकाले । विजित र शोभाको जोडीले सेनाका प्रफुल महर्जन र अनुमाया राईको जोडीलाई २१–१९, २१–१८ ले हराउँदै सेमिफाइनलमा स्थान बनाए ।

हल्चोकस्थित एपीएफको कभर्डहलमा भएको प्रतियोगिताको महिला एकलतर्फ सेनाका खेलाडीहरूले बर्चस्व कायम गरे । सेनाका अमिता गिरी, रसिला महर्जन र अनुमाया राईले अन्तिम ४ मा स्थान पक्का गरे ।