राष्ट्रिय खेलकुद परिषद्को नेतृत्वदायी भूमिकामा जिम्मेवारी पाएपछि सदस्य–सचिव रमेशकुमार सिलवालले नेपालमा हुने १३औं दक्षिण एसियाली खेलकुदलाई लक्षित गरी विभिन्न खेल पूर्वाधारको अवस्थाबारे जानकारी लिने कार्यलाई तीव्रता दिँदै आएका छन् । ‘साग’मा समावेश विभिन्न २७ खेलका संघका पदाधिकारीसँगको छलफल पनि सँगसँगै अगाडि बढाइरहेका छन् ।

सो क्रममा पूर्वाधारको निरीक्षण गर्ने क्रममा सदस्यसचिव सिलवालले मुलपानी अन्तर्राष्ट्रिय क्रिकेट मैदान, गोकर्ण क्लब कोर्स र गोकर्णस्थित साइक्लिङको क्रसकन्ट्री तथा डाउन हिल स्पर्धा हुने स्थानको स्थलगत निरीक्षण गरेका थिए ।

सो अवसरमा सदस्यसचिव सिलवालले समस्याका बारेमा जानकारी लिनुका साथै समस्याबारे लिखित रुपमा पेश गर्न सम्बन्धित पक्षलाई आग्रह गर्दै सिलवालले त्यसलाई कार्यान्वयन गर्ने प्रतिबद्धता व्यक्त गरेका छन् । साग आफ्नो पहिलो प्राथमिकता भएकाले यसलाई सफतापूर्वक सम्पन्न गर्न कुनै कसर बाँकी नराख्ने बताउदै यस कार्यमा सरोकारवाला सबैको साथको आवश्यकता रहेकामा जोड दिए ।