आउँदो मंसिरको १५ देखि २४ गतेसम्म नेपालमा आयोजना हुने १३औं दक्षिण एशियाली खेलकुदअन्तरर्गत ह्याण्डबल खेलको बन्द प्रशिक्षण व्यवस्थित गर्न एक समिति गठन गरिएको छ ।

गण्डकी प्रदेशसभाका सांसद तथा नेपाल ह्याण्डबल संघका उपाध्यक्ष मोहन रेग्मी अनुगमन समितिको संयोजकमा र नेपाल ह्याण्डबल संघका सचिव केशव पाठक बसोबास तथा यातायत समितिको संयोजकमा रहेका छन् ।

सागअन्तर्गत महिला तथा पुरुषको ह्याण्डबल खेल पोखरामा हुने भएकोले बन्द प्रशिक्षण समेत पोखरामा हुने नेपाल ह्याण्डबल संघका अध्यक्ष तेज गुरुङले बताए ।

पोखरा रंगशालामा रहेको ह्याण्डबल एकेडेमीको मैदानलाई समेत स्तोरोन्नति गरिने भएको छ । राष्ट्रिय खेलकुद परिषदले साग खेलका लागि मैदानको स्तरोन्नतिका लागि आ.व. ०७६÷७७ मा ५० लाख रकम विनियोजन गरेको छ । उक्त रकमबाट मैदानलाई अन्तर्राष्ट्रिय स्तरको बनाउन ढलान गरिने र आधुनिक म्याट समेत बिछ्याउने कार्यक्रम रहेको अध्यक्ष गुरुङले बताए ।

ह्याण्डबल मैदानको ढलानसहित म्याट ओछ्याउन करिव १ करोड २५ लाख खर्च लाग्ने अनुमान गरिएको छ । उक्त मैदानलाई सागअघि तयार गरि सक्ने योगेन्द्रबहादुर बस्नेतको संयोजकत्वमा ९ सदस्यीय उपभोक्ता समिति गठन गरिएको कास्की जिल्ला ह्याण्डबल संघले जनाएको छ । उक्त समितिको उपाध्यक्षमा राम गुरुङ र सचिवमा श्रीकृष्ण अधिकारी रहेका छन् ।

त्यसैगरी उपभोक्ता समितिको कोषाध्यक्षमा शान्ति थापा सदस्यहरूमा खिम गुरुङ, विश्व तन्डुकार, पदम नेपाली, मोहन गुरुङ र टीकाराम पुन रहेका छन् । कास्की जिल्ला ह्याण्डबल संघका कार्यवाहक अध्यक्ष चित्र थापाको अध्यक्षता संघका केन्द्रिय अध्यक्ष तेज गुरुङको उपस्थितिमा बैठक सम्पन्न भएको थियो ।