पाकिस्तानी शहर रावलपिन्डीनजिकको आवासीय क्षेत्रमा मंगलबार बिहान भएको सैनिक विमान दुर्घटनामा १८ जनाको मृत्यु भएको अधिकारीहरूले बताएका छन् । सेनाको प्रमुख कार्यालयहरू रहेको रावलपिन्डी सहरको छिमेकमा रहेको एक गाउँमा सो विमान दुर्घटना भएको थियो ।
सो दुर्घटनामा मारिएका १३ जना सर्वसाधारण र पाँच चालक दलका सदस्यसहित १८ जनाको शव अस्पताल लगिएको उद्धार टोलीका प्रवक्ता फारोक बुटाले बताए । राजधानी इस्लामावादनजिकै भएको यस दुर्घटनामा १२ सर्वसाधारण पनि घाइते भएका छन् । सबै शव नराम्ररी जलेकाले परिचय खुलाउन डीएनए परीक्षण गर्नुपर्ने अवस्था रहेको बुटाले जानकारी दिए ।
एक स्थानीय बासिन्दाका अनुसार मंगलबार बिहान २ बजे सो विमान दुर्घटनाग्रस्त भएको थियो । ठूलो आवाजका साथ भएको विस्फोटका कारण आफू निद्राबाट ब्युँझिएर घरबाहिर गएर हेर्दा आगलागी भइरहेको मोहमद सदिकले बताएका छन् । विमानमा सवार कतिपयले सहयोगका लागि चिच्याएका र उनीहरूको सहयोगको प्रयास गरिएको, तर सम्भव नभएको सदिकले बताए । उनका अनुसार सो दुर्घटनामा एकै परिवारका सातजनाको ज्यान गएको छ ।
सेनाको सूचना शाखाका अनुसार यो सैनिक विमान नियमित प्रशिक्षणमा रहेको थियो । उद्धारकर्मीहरूले आगलागी नियन्त्रणमा लिई घाइतेलाई स्थानीय अस्पतालमा पु¥याएका थिए । यस दुर्घटनामा ज्यान गुमाएका व्यक्तिको परिवारजनप्रति पाकिस्तानका प्रधानमन्त्री इमरान खानले गहिरो समवेदना प्रकट गरेका छन् ।
प्रतिक्रिया