अमेरिकाको टेक्सास राज्यको एल पासोस्थित एक व्यस्त वाल्मार्ट सपिङ मलमा एक युवाले चलाएको गोली लागेर २० जनाको मृत्यु भएको प्रहरीले जनाएको छ । उक्त गोलीकाण्डमा अरू २६ जना सख्त घाइते भएका छन् । गोली चलेका बखत उक्त सपिङ मलमा अन्दाजी तीन हजार मानिस भेला भएका थिए । नयाँ शैक्षिक सत्रको पूर्वसन्ध्यामा आफ्ना स्कुले केटाकेटी लिएर शनिबार ठूलो संख्यामा अभिभावकहरू मलमा जम्मा भएका थिए ।

प्रहरीले गोली चलाउने संदिग्ध व्यक्तिलाई पक्राउ गरेको छ । ती व्यक्तिले घटना हुनुअघि फेसबुकमा राखेको सन्देशमा आफूलाई आप्रवासी अमेरिकीप्रति घृणा रहेको बताएका थिए । एस पासोका प्रहरी प्रमुख ग्रेग अलेनले वाल्मार्टबाहिर ती संदिग्ध व्यक्तिलाई प्रहरीले गिरफ्तार गरेको बताए । मेक्सिको सीमाबाट करिब ८ किलोमिटरभित्र उक्त वाल्मार्टको सपिङ मल रहेको थियो ।

एसोसिएटेड प्रेससँग कुरा गर्दै स्थानीय अधिकारीले गोली चलाउने व्यक्ति २१ वर्षीय प्याट्रिक क्रुसिएस रहेको बताएका छन् । तर, एल पासो प्रहरीले ती व्यक्तिको नाम औपचारिक रूपमा सार्वजनिक गरेको छैन । उनी अर्को अमेरिकी राज्य डल्लासबाट त्यहाँ आएको बताइएको छ । प्रहरीका अनुसार वाल्मार्टभित्र रहेका व्यक्तिहरू सबैभन्दा बढी पीडित भएका छन् । प्रहरी प्रमुख अलेनले भने, ‘यहाँको दृश्य अति नै भयावह छ ।’ गोली लागेका अरू २६ जनाको स्वास्थ्य अवस्था पनि निकै गम्भीर रहेको उनले बताए ।

प्रहरीले घाइतेहरूका लागि रगतको अभाव रहेको सूचना सार्वजनिक गर्नुपरेको थियो । प्रहरी र सेनाले तनावमा रहेका नागरिकलाई सान्त्वना दिन प्रयास गरेका थिए । ‘अहिले यहाँको वातावरण आतंकित गर्ने किसिमको छ,’ सैनिक स्वास्थ्यकर्मी अस्टिन जोन्सनले भने । वाल्मार्टको महिलाको लत्ताकपडा किन्ने ठाउँमा दुई बच्चासँग रहेकी ३९ वर्षीया एड्रियाना क्वुजेदाले भनिन्, ‘निरन्तर हिर्काएको आवाज आइरहेको थियो, मानौँ कुनै निर्माणको कार्य भइरहेको थियो ।’

उनका १९ वर्षीया छोरी र १६ वर्षीय छोरा दुवैजना भुइँमा सुतेका थिए । त्यसपछि उनीहरू दुवै आपतकालीन ढोकाबाट बाहिर भागेका थिए । क्वुजेदाले भनिन्– भाग्यवश दुवैजना सकुशल बाहिर निस्किए । उनले कालो कपडा लगाएका चार व्यक्तिले जथाभावी गोली चलाएको बताइन् । तर, प्रहरीले घटनामा एक व्यक्ति मात्र रहेको बताएको छ ।

अमेरिकी राष्ट्रपति डोनाल्ड ट्रम्पले ट्विट गर्दै ‘भगवान तपाईंहरूको साथमा हुनुहुन्छ’ भनेका छन् ।

घटनाप्रति डेमोक्य्राट पार्टीका सबैजसो नेताहरूले एल पासो गोलीकाण्ड अमेरिकी इतिहासकै कालोधब्बा भन्दै अमेरिकी बन्दुक कानुनमा तत्काल संशोधन गर्नुपर्ने आवाज उठाएका छन् । एल पासोका मेयर डी मार्गोले प्रहरीले घटनाको अनुसन्धान गरिरहेको बताए । संदिग्ध व्यक्ति क्रुसियसले फेसबुकमा लेखेको भनिएको सन्देशको पनि छानबिन भइरहेको मेयर मार्गोले जानकारी दिए । उक्त सन्देशमा हिस्पानिक समुदायका व्यक्तिहरू अमेरिकामा ठूलो संख्यामा आप्रवासीका रूपमा प्रवेश गरेकोप्रति रोष प्रकट गरिएको छ । सन्देशमा हिस्पानिक समुदायका कारण आगामी राष्ट्रपतीय चुनावमा टेक्सास राज्य डेमोक्य्राट पार्टीको पोल्टामा पुग्ने पनि जनाइएको छ ।

सन् २००६ यता ११ पटक ठूलो जनसमुदायमाथि बन्दुक आक्रमण भएको छ । यी घटनामा संलग्न व्यक्तिहरू प्रायः २१ वर्षको हाराहारीका रहेका छन् । सन् २०१९ मा मात्र भिडभाड स्थलमा भएका आक्रमणबाट ९६ जनाको ज्यान गइसकेको छ ।

एक साताभित्रै अमेरिकामा भएको यो दोस्रो गोलीकाण्ड हो । यसै साता गिलरोए गार्लिक मेलामा एक १९ वर्षीय युवाले जथाभावी गोली चलाउँदा तीनजनाको मृत्यु हुनुका साथै १९ जना घाइते भएका थिए ।
ap