अफगानिस्तानमा सेनाले देशभर चलाएको सुरक्षा कारबाहीमा परी चोबिस घण्टा अवधिमा सयभन्दा बढी तालिवान लडाकूको मृत्यु भएको छ । सरकारी अधिकारीहरूले गरेका यस दाबीबारे तालिवान समूहबाट भने कुनै प्रतिक्रिया आइसकेको छैन ।

एएनआईले जनाएअनुसार सुरक्षाकर्मीले देशका विभिन्न १५ राज्यमा १८ स्थानमा विद्रोहीविरूद्ध कारबाही चलाएको थियो । अफगानिस्तानको रक्षा मन्त्रालयद्वारा मङ्गलबार जारी विज्ञप्तिमा भनिएको छ, ‘विगत २४ घण्टामा देशका विभिन्न १५ राज्यमा १८ स्थानमा विद्रोहीविरूद्ध सेनाले कारबाही चलाएको र ती घटनामा कम्तीमा १०९ लडाकू मारिएका छन् भने कम्तीमा ४५ जना घाइते भएका छन् ।’ मन्त्रालयले लडाकू एउटै समूहका हुन् वा फरक फरक समूहका भन्ने प्रष्ट खुलाएको छैन ।

अफगानिस्तानमा हालै भएको निर्वाचनमा असरफ घानी निर्वाचित भएको प्रारम्भिक भनाइहरू आइरहेका समय सेनाले यति ठूलो सङ्ख्यामा लडाकूको मृत्यु हुने गरी कारबाही चलाएको छ । अफगानिस्तानी तालिवान समूह र अमेरिकी प्रतिनिधिबीच स्थायी शान्ति वार्ताका लागि पहल भइरहेका समय पछिल्लो कारबाही भएको हो ।