सर्लाहीको गोडैता नगरपालिका–६ बगदहमा रहेको महालक्ष्मी सुगर मिल सञ्चालन आउने भएको छ । किसानलाई भुक्तानी गर्नुपर्ने गत वर्षको बक्यौता रकम मिल सञ्चालक वीरेन्द्र कनौडियाले मङ्गलबार बैंकमा जम्मा गरिदिएपछि आज (२३ पुस) देखि सञ्चालनमा आउन लागेको हो ।

सञ्चालक कनौडियाले ११ करोड २६ लाख भुक्तानीका लागि बैंकमा जम्मा गरिदिएका थिए । गोडैता नगरपालिका प्रमुख देवेन्द्रकुमार यादवले सञ्चालकले किसानको पाउनुपर्ने रकम जम्मा गरिदिएपछि मिल सञ्चालनमा आउने जानकारी दिएका हुन् ।

सो मिलले किसानको करिव २१ करोड बाँकी भुक्तानी गर्न बाँकी रहेको जनाइएको छ । किसानको खातामा बुधबारदेखि पैसा भुक्तानी हुने र किसानको खातामा पैसा राख्ने भएपछि उद्योग पनि आजैदेखि सञ्चालन हुने जानकारी गराइएको छ ।