नेपाली काङ्ग्रेस केन्द्रीय खेलकुद विभागले १३औँ दक्षिण एसियाली खेलकुद प्रतियोगिता (साग)मा स्वर्ण पदक जित्ने ८० जना खेलाडीलाई नगद पुरस्कारसहित सम्मान गर्ने भएको छ ।

सम्मान कार्यक्रम नेपाली काङ्ग्रेसको केन्द्रीय कार्यालय सानेपामा साउन १६ गते शुक्रबार आयोजना हुने विभागका सचिव मीनकृष्ण महर्जनले बताए । सो कार्यक्रमको मुख्य अतिथि नेपाली काङ्ग्रेसका सभापति तथा पूर्वप्रधानमन्त्री शेरबहादुर देउवा रहेको महर्जनले जानकारी दिए । सभापति देउवाले विजयी खेलाडीलाई सम्मान गर्ने कार्यक्रम रहेको छ ।

नेका खेलकुद विभागले १३औँ सागमा विजयी खेलाडीलाई नगद १० हजार र प्रशंसापत्रसहित सम्मान गर्नेछ । १३औँ सागमा नेपालले ५१ स्वर्ण जिते पनि विभागले सबै स्वर्ण जित्ने खेलाडीहरूलाई सम्मान गर्न लागेको हो ।

विभागले एकल प्रतिस्पर्धा र टिम प्रतिस्पर्धामा स्वर्णपदक जित्ने सम्पूर्ण खेलाडीहरूको समान मूल्याङ्कन गर्दै ८० जना स्वर्णधारी खेलाडीलाई नगद १० हजारसहित सम्मान गर्ने निर्णय गरेको हो । सम्पूर्ण स्वर्णपदक जित्ने खेलाडीहरूको महत्व र योगदान समान हुने भन्दै विभागलले यस्तो निर्णय गरेको खेलकुद विभाग प्रमुख मोहनबहादुर बस्नेतले बताए ।

विभागले सागमा स्वर्ण पदक विजेता खेलाडीहरूलाई नगदसहित सम्मान गर्ने घोषणा गत साता नै गरेको थियो । विभागको सोही निर्णयअनुरुप सागमा स्वर्ण पदक विजेता खेलाडीलाई सम्मान गर्न लागेको हो ।