इङ्गल्याण्डका फास्ट बलर स्टुअर्ट ब्राड टेस्ट क्रिकेटमा कीर्तिमानी पाँच सय विकेट लिने विश्वका सातौँ खेलाडी बनेका छन् । त्यस्तै ब्राड इङ्गल्यान्डको तर्फबाट ५ सय विकेट लिने दोश्रो खेलाडी बनेका छन् । ब्राडले यो उपलब्धि हालै म्यानचेस्टरमा सम्पन्न वेष्टइन्डिजविरुद्धको तेस्रो टेष्टमा हासिल गरेका हुन् ।

इङ्गल्याण्डको तर्फबाट जेम्स एन्डसनले पहिलो पटक ५ सय विकेट लिएर आफ्नो नाममा कीर्तिमान कायम गरेका थिए । एन्डसनले यो उपलब्धि सन् २०१७ मा हासिल गरेका थिए । एन्डसनले ५ सय विकेट वष्टइन्डिजविरुद्धको खेलमै लिएका थिए । संयोग यस्तो कि ब्राडले पनि आफ्नो ५ सय विकेट वष्टइन्डिजका क्रेग ब्रेथवेटको विकेट लिएर पूरा गरेका थिए ।

टेष्ट क्रिकेटमा सबैभन्दा बढि विकेट श्रीलंकाका मुथैया मुरलीधरनले लिएका थिए । मुरलीधरनले ८ सय विकेट लिएर कीर्तिमान कायम गर्दै पहिलो स्थानमा रहेका छन् । त्यस्तै दोश्रो स्थानमा रहेका अष्टे«लियाका शेन वार्नले ७ सय ८, तेस्रो स्थानमा रहेका भारतका अनिल कुम्बलेले ६ सय १६ विकेट लिएका छन् ।

यसैगरी अन्य ५ सयभन्दा माथि विकेट लिने खेलाडीहरूमा जेम्स एन्डसन (५८९), ग्लेन म्याग्रा (५६३) र कर्टनी वाल्स (५१९) रहेका छन् । वाल्स वष्टइन्डिजको तर्फबाट टेष्ट क्रिकेटमा सर्वाधिक विकेट लिने पहिलो खेलाडी हुन् । हालै टेष्ट क्रिकेटमा ५ सय विकेट लिएर ऐतिहासिक उपलब्धि हासिल गर्ने स्टुअर्ट ब्राडले सन् २००७ मा श्रीलंकाविरुद्धको खेलमा डेब्यू गरेका थिए ।