नेपाली राष्ट्रिय फुटबल टोलीका खेलाडी अभिषेक रिजाल भारतीय क्लब मोहमेदन एससीमा आवद्ध भएका छन् ।

मोहमेदन भारतको कोलकाताको पुरानो क्लब हो । चन्द ब्रदर्स प्रालिको पहलमा रिजाललाई दोस्रो डिभिजनको लिग खेल्ने उक्त क्लबमा तीन वर्षका लागि आवद्ध भएका हुन् । चन्द ब्रदर्सका रविन्द्र चन्दले जनाकारी दिएअनुसार रिजाल एसियन कोटाबाट टोलीमा आवद्ध हुन सफल भएका हुन् । रिजालले पाउने पारिश्रमिकबारे भने केही खुलाइएको छैन ।

रिजालले यसअघि माल्दिभ्सको दोस्रो डिभिजनको क्लबबाट फुटबल खेलिसकेका छन् । उनीसित नेपाल पुलिस क्लब, मच्छिन्द्र क्लब र मनाङ मर्स्याङ्दी क्लबबाट खेलेको लामो अनुभव छ । आफूले पाएको अवसरको सदुपयोग गर्ने रिजालले बताए । भारतको दोस्रो डिभिजन लिग खेलिरहेको मोहमेदन एफसीलाई लिगको शीर्ष स्थानमा पुरयाउन सक्दो मेहनत गर्ने उनले बताए ।

कोरोना महामारीका कारण रोकिएको उक्त लिग यही महिनादेखि शुरु हुँदैछ । बन्द रंगशालामा लिग आयोजना गर्ने तयारी छ । रिजाल बिहीबार (४ भदौ)मैभारतको कोलकातातर्फ लागेका छन् ।