सत्तारुढ नेपाल कम्युनिष्ट पार्टीको आन्तरिक विवाद मिलाउन अध्यक्षद्वयले गठन गरेको कार्यदलले दिएको प्रतिवेदनबारे छलफल गर्न आज (१८ भदौ) दिउँसो सो पार्टीको सचिवालय बैठक बस्दैछ ।

यसअघि यही भदौ १३ गतेका लागि निर्धारित सचिवालयको बैठक आज बिहान ११ बजेका लागि राखिएको थियो । सो समयलाई समेत सच्चयाउँदै पुनः दिउँसो ३ बजेका लागि बैठक तय गरिएको नेकपाका केन्द्रीय प्रचार विभाग उपप्रमुख सूर्य थापाले जानकारी दिएका हुन् ।

बैठकको मूल विषय राष्ट्रियसभामा रिक्त मनोनित कोटामा सदस्य सिफारिशबारे छलफल रहेको बताइन्छ । अर्थमन्त्री डा. युवराज खतिवडाको राष्ट्रिय सभा सदस्यको अवधि सकिएपछि पनि पुनः ६ महिनाको लागि मन्त्री कायम गरिएको थियो । अब सो अवधि पनि समाप्त हुन लागेकोले मन्त्री खतिवडाको जिम्मेवारी सम्बन्धमा तत्काल निर्णय लिनुपर्ने दबाबमा प्रधानमन्त्री परेका छन् । राष्ट्रिय सभामा रिक्त एक सदस्यको स्थानमा पुनः खतिवडालाई मनोनयन गराएर उनलाई अर्थमन्त्रीको रुपमा निरन्तरता दिने मनसुवा प्रधानमन्त्री केपी ओलीले राखेको चर्चा यतिबेला व्याप्त छ । तर, बामदेव गौतम राष्ट्रियसभामा जान पुनः लालायित देखिएका छन् । यसले प्रधानमन्त्री ओलीलाई सकसमा पारेको विश्लेषण गरिँदैछ ।

पार्टी अध्यक्ष एवं प्रधानमन्त्री ओली र सहअध्यक्ष प्रचण्डबीच गत साउन ३० मा भएको छलफलबाट महासचिव विष्णु पौडेलको संयोजकत्वमा गठित ६ सदस्यीय कार्यदलले यही भदौ ६ गते अध्यक्षद्वयलाई प्रतिवेदन बुझाएको थियो । प्रतिवेदनमा प्रधानमन्त्री ओलीले सरकारको काममा केन्द्रित भई बाँकी कार्यकाल पूरा गर्ने र प्रचण्डले पार्टीको कार्यकारी अध्यक्षमा आफूलाई केन्द्रित गर्ने, मन्त्रिपरिषद्मा आवश्यकतानुसार हेरफेर गर्ने, तोकिएको समयमा महाधिवेशन गर्ने, एकताका बाँकी काम शिघ्र पूरा गर्ने लगायत सुझाव छन् । यससम्बन्धमा पनि आजको बैठकमा छलफल हुने बुझिएको छ ।

ज्ञातव्य छ, यसअघि भदौ १ गतेको सचिवालय बैठकले कार्यदललाई बधाई ज्ञापन र अनुमोदन गरेको थियो । नेकपामा गत असार १० गते शुरु भएको स्थायी कमिटीमा नियमित कार्यसूचीका अतिरिक्त शक्ति बाँडफाँट र सरकार–पार्टीबीचको समन्वयबारे विवाद उत्पन्न भएपछि कार्यदलमार्फत समाधान निकालिएको हो ।