भरतपुर अस्पतालमा मृत्यु भएका तीन जनामध्ये एक पुरुषमा कोरोना सङ्क्रमण पुष्टि भएको अस्पतालले जानकारी गराएको छ । मृत्युपछि सङ्क्रमण पुष्टि हुनेमा रत्ननगर नगरपालिका वडा नम्बर २ का ४६ वर्षीय पुरुष रहेका छन् ।

बताइएअनुसार अस्पतालको आकस्मिक कक्षमा आइपुग्दा बिहीबार राति उनको मृत्यु भएको थियो । मृत्युपछि गरिएको नमुना परीक्षणमा उनमा कोरोना पुष्टि भएको हो ।

अन्य दुई जनाको भने नतिजा नेगेटिभ आएको बताइएको छ ।

अस्पतालका सूचना अधिकारी लीलाधर पौडेलका अनुसार शुक्रबार बिहान मृत्यु भएकी राप्ती नगरपालिका वडा नम्बर ४ की १८ वर्षीया युवतीको नतिजा नेगेटिभ आएको छ । उनको पनि उपचारका लागि अस्पताल पुग्दानपुग्दै मृत्यु भएको थियो ।

यस्तै, बिहीबार दिउँसो अस्पतालको सघन उपचार कक्षमा खैरहनी नगरपालिकाकी २२ वर्षीया युवतीको उपचारको क्रममा मृत्यु भएको थियो । पौडेलका अनुसार उनको पनि नतिजा नेगेटिभ आएको छ ।

मृतक तीनै जनालाई ज्वरो, खोकीसहित श्वासप्रश्वासमा समस्या देखिएको थियो । कोरोनासँग मिल्दोजुल्दो लक्षण देखिएपछि स्वाब परीक्षणका लागि पठाइएको थियो ।

अस्पतालले जनाएअनुसार यसअघि भदौ १४ गते अस्पतालको आकस्मिक कक्षमा अन्य तीन जनाको एकैदिन उपचारकै क्रममा मृत्यु भएको थियो । उनीहरुको कोरोना परीक्षण गर्दा तीनै जनाको नतिजा पोजेटिभ आएको थियो ।