नुवाकोटबाट काभ्रे पठाइयो

स्काभेटर आगजनी गरेको अभियोगमा पक्राउ परेका विप्लव नेतृत्वको प्रतिबन्धित नेकपाका नेता अनिल शर्मा ‘विरही’ (छविलाल सापकोटा) साधारण तारिखमा छुटेलगत्तै पुनः पक्राउ परेका छन् ।

नुवाकोटको बेलकोटगढी नगरपालिका-१३ स्थित राजेन्द्र तामाङको स्काभेटरमा गत भदौ ७ गते राति भएको आगजनी घटनामा संलग्न अभियोग मुद्दामा मङ्गलबार नुवाकोट जिल्ला अदालतका न्यायाधीश उमेशप्रसाद लुइँटेलले साधारण तारिखमा रिहा गर्न आदेश दिएलगत्तै शर्मालाई प्रहरीले पक्राउ गरेर काभ्रे पठाएको हो ।

उनलाई मङ्सिर १८ गते ललितपुरबाट पक्राउ गरेर नुवाकोट लगिएको थियो । प्रतिबन्धित नेकपाका नेता शर्मा मदानपुरको स्काभेक्टर आगजनीमा संलग्न भएको भरपर्दो प्रमाण नभएको भन्दै अदालतले साधारण तारिखमा रिहा गर्न आदेश दिएको थियो ।

चितवनको रत्ननगरका शर्मालाई गत वैशाख २३ मा त्यहाँको प्रहरीले उपचारका क्रममा अस्पतालबाटै पक्राउ गरेको थियो ।

भदौ २३ गतेसम्म पुर्पक्षका लागि थुनामा रहेको समयमा भदौ ७ मा मदानपुरमा स्काभेक्टर आगजनीमा संलग्नता रहेको दाबी विश्वासिलो नभएको आधारमा शर्मालाई साधारण तारिखमा छाड्ने आदेश भएको थियो ।

साधारण तारिखमा छुटेलगत्तै अदालत परिसरबाटै पक्राउ परेका शर्मालाई गए राति नै काभ्रे पठाइएको नुवाकोट प्रहरी प्रमुख तुलबहादुर कार्कीले जानकारी दिए । बताइएअनुसार शर्मालाई काभ्रेमा सङ्गठित अपराध, एनसेल टावर आगजनीलगायतको अभियोग छ ।

गत वैशाख २३ मा चितवनबाट पक्राउ परेका शर्मा भदौ २३ मा त्यहाँबाट छुटेलगत्तै पक्राउ गरेर धनुषा, सुनसरी, भोजपुर, सङ्खुवासभा, मोरङ, काठमाडौं, ललितपुर हुँदै नवौँ जिल्लाको रूपमा नुवाकोट लगिएको थियो । आफूलाई लगाइएको अभियोग कहीँ पनि पुष्टि गर्ने आधार नभएकाले राजनीतिक पूर्वाग्रहका रूपमा राज्यले झुटा मुद्दा लगाई फसाउन खोजेको बिरहीको प्रतिक्रिया छ ।

विप्लव नेतृत्वको नेकपा पछिल्लो समयमा हिंसात्मक र ध्वंशात्मक गतिविधिमा संलग्न हुन थालेको भन्दै राज्य संयन्त्रबाट विभिन्न बहानामा धरकपड, पक्राउ गर्नुका साथै सो पार्टीको राजनीतिक गतिविधिमा प्रतिबन्ध लगाइएको छ ।