नेकपाको विभाजन हुँदासम्म प्रचण्ड पक्षमा दृढतापूर्वक उभिएका नेता (उपाध्यक्ष) वामदेव गौतम पार्टीको फुटपछि भने ‘तटस्थ’ भूमिकामा देखापरेका छन् । सचिवालयमा बामदेव गौतमले तटस्थ भूमिका निर्वाह गर्दा कुनै निर्णय हुन नसक्ने (दुवैतिर चार-चार जना) अवस्था थियो भने गौतमले साथ दिएको पक्ष बहुमतमा रहने निश्चित थियो । यसपटक पार्टी विभाजनको पक्षमा त बामदेव थिएनन्, तर ठीक समयमा उचित भूमिका निर्वाह गर्न भने उनले सकेनन् ।

बामदेवले प्रचण्ड र केपी दुवै पक्षले आयोजना गरेका बैठकहरूमा अहिलेसम्म सहभागिता जनाएका छैनन्, तर गत आइतबार गौतमले दिएको एउटा अभिव्यक्तिले भने उनी प्रचण्ड पक्षमा नलाग्ने सङ्केत दिएको छ । गौतमले आफ्नो निकटस्थहरूसँग प्रश्न गरेका छन्- ‘प्रचण्ड मिल्न आएका हुन् कि एमाले निल्न ?’ उनको यस्तो अभिव्यक्ति सुन्नेहरूले बामदेव अन्ततः केपीकै पक्षमा जोडिने ठान्न थालेका छन् ।

विभाजित नेकपामा को कतातिर लाग्ने भन्ने कुराको निर्णायक प्रभाव चुनावचिन्हले पार्ने देखिन्छ । अब पार्टीको नाम र चुनावचिन्हका विषयलाई लिएर नेकपाभित्र कानूनी र राजनीतिक लडाइँ निकट भविष्यमै शुरु हुनेछ । दुवै पक्षले नेकपा नाम र सूर्यचिन्ह हात पार्न कोशिस गर्दा निर्वाचन आयोगले कस्तो निर्णय सुनाउला भन्ने जिज्ञाशा सवत्र छ ।

सूर्य चिन्ह लिएर गत निर्वाचनमा विजयी सांसदहरूको बहुमतले ‘सूर्य’ चिन्ह लिखित रूपले नै माग गरेमा निर्वाचन आयोगले उक्त मागलाई उपेक्षा गर्न मुस्किल पर्ने देखिन्छ । केपीको पक्षमा एमाले कित्ताका कुल १२१ सदस्यमध्ये कम्तिमा ७५ देखि ८० सम्म रहेको बताइन्छ । त्यस्तो अवस्थामा पार्टीको नाम प्रचण्डलाई दिएर चुनाव चिन्ह सूर्यचाहिँ केपी पक्षलाई उपलब्ध गराउने निर्णयमा निर्वाचन आयोग पुग्यो भने कुनै आश्चर्य हुने छैन । त्यस्तो अवस्थामा एमाले कित्ताका अधिकाङ्श नेता-कार्यकर्ताहरू ‘सूर्य’तिरै सर्ने सम्भावना छ । र, बामदेव गौतमले पनि ‘सूर्य’कै प्रतीक्षा गर्ने विश्वास गरिएको छ ।