काठमाडौंको खुल्लामञ्चबाट सञ्चालित लामो तथा छोटो दूरीका यातायातका साधन यही वैशाख १५ गतेदेखि रोकेर राख्न नपाइने भएको छ । काठमाडौं महानगरपालिका मातहत रहेको खुल्लामञ्चबाट सञ्चालित सबै यातायातका साधन गोङ्गबु बसपार्क र छोटो दूरीका गाडी पिक एण्ड ड्रप प्रणालीबाट सञ्चालन गर्ने तयारी गरिएको छ ।

विगत ६ वर्षदेखि यातायातका साधन उक्त स्थानबाट सञ्चालन हुँदा समस्या आएको भन्दै कामपाले आगामी १५ गतेदेखि लागू हुने गरी उक्त निर्णय गरेको हो । खुल्लामञ्च खाली गराई त्यहाँका संरचना हटाउने प्रस्तावमाथि छलफल गर्दै खुल्लामञ्चलाई मौलिक प्रयोगमा ल्याउन यस्तो निर्णय गरिएको कामपाका प्रमुख प्रशासकीय अधिकृत राजेश्वरी ज्ञवालीको भनाइ छ ।

यसअघि हाल भ्युटावर निर्माण भइरहेका स्थानबाट लामो तथा छोटो दूरीका सवारी साधन आवतजावत हुने गरेका थिए । साविक पुरानो बसपार्क काठमाडौं भ्युटावर निर्माण भए पनि निर्माणको कामले गति नलिएपछि कमपालाई बसपार्क व्यवस्थापनमा फेरि समस्या भएको छ ।

वि.सं. २०७२ साउनदेखि बसपार्कलाई खुल्लामञ्चमा स्थानान्तरण गरिएको थियो । पाँच वर्षमा भ्युटावर निर्माणको काम सम्पन्न गर्ने र साविकै बसपार्क रहेको स्थानबाट थप व्यवस्थित रुपमा सवारी साधनलाई आवतजावत गराइने भने पनि हालसम्म पनि उक्त टावरको निर्माणको काम सम्पन्न नहुँदा थप समस्या भएको हो ।

यहाँबाट सञ्चालन हुने सार्वजनिक सवारीलाई दुई वटा विकल्प दिइएको छ । ‘टिकट काउन्टर राखेर चलेका मध्यम दूरीका गाडी गोङ्गबु बस पार्कबाट सञ्चालन हुनेछन् । यस्तै छोटो दूरीका सवारी पिक एण्ड ड्रप प्रणालीबाट चल्नेछन् । पिक एण्ड ड्रप प्रणालीमा चल्ने गाडीका सन्दर्भमा सार्वजनिक सूचना प्रकाशन गरिनेछ । यसका आधारमा निवेदक (यातायात सञ्चालक) बाट प्राप्त निवेदनका आधारमा महानगर र ट्राफिक प्रहरी महाशाखाले व्यवस्थापन गर्नेछन् ।’

त्यहाँको बसपार्क सारेर यही वैशाख १५ गतेभित्र कामपाले त्यस ठाउँका सबै संरचना हटाउने तयारी गरेको छ । हामीले यस प्रयोजनका लागि धेरै पटक, सरोकारवालासँग छलफल गरेका छौँ । सहरी सुव्यवस्था विभागका प्रमुख ध्रुव काफ्ले भन्नुभयो, ‘हामीले यस बसपार्कसँग सरोकार राख्ने सरोकार राख्नेलाई सार्वजनिक सूचना दिने तयारी गरिरहेका छौँ ।’

पन्ध्र गतेपछि कामपाले उक्त स्थानमा यातायातका साधन प्रवेश गर्ने र निष्कने स्थान दुवैमा रोक लगाउने छ । बताइए अनुसार अहिले भ्युटावरको काम ३० प्रतिशत सकिएको छ । पाँच वर्षमा सक्नेगरी २०७२ वैशाखदेखि टावर निर्माणको काम शुरु भएको थियो ।