वडास्तरदेखि नै योग्य नेतृत्व छान्न नेता सिंहको सुझाव

नेपाली कांग्रेसका नेता प्रकाशमान सिंहले पार्टीमा वडा स्तरदेखि नै योग्य नेतृत्व छान्नुपर्ने धारणा राखेका छन् ।

लोकतन्त्रका लागि हाम्रो अभियानले बुधबार काठमाडोंमा आयोजना गरेको ‘नेपाली कांग्रेसको १४औँ महाधिवेशन : नीति र नेतृत्वमा महिला’ विषयक बागमती र गण्डकी प्रदेशस्तरीय भर्चुअल अन्तरक्रियामा नेता सिंहले पार्टीलाई बलियो बनाउन गाउँ तहदेखि नै योग्य नेतृत्व छनोट गर्नुपर्ने बताएका हुन् । आफू काठमाडौंको सभापति हुँदा पार्टीको जिल्ला सचिवदेखि तरुण दलको अध्यक्षसम्म महिलालाई बनाएको स्मरण गर्दै उनले नीति निर्माण गर्ने थलोमा महिला सहभागिता बलियो बनाउनुपर्ने तर्क गरे ।

सोही अवसरमा कांग्रेसका केन्द्रीय सदस्य एनपी साउदले नेपालमा महिला आन्दोलनका कारण अहिले राज्यका विभिन्न अङ्ग र पार्टीमा महिलालाई ३३ प्रतिशत उपस्थितिको व्यवस्था गरिएको बताए । महिलालाई जति सशक्तिकरण गर्न सक्यो त्यति नै देशको विकासमा सहयोग पुग्ने उनको तर्क थियो ।

केन्द्रीय सदस्य रत्ना शेरचनले पार्टीको पदाधिकारीमा महिला प्रतिनिधित्व बढाउनुपर्ने बताइन् भने प्रदेशसभा सदस्य राधा घलेले पार्टीको नेतृत्वमा महिलाको उपस्थिति गराउन महिलाहरु एकजुट भएर लाग्नुपर्ने जिकिर गरिन् । यस्तै, काठमाडौं महानगरपालिकाका उपप्रमुख हरिप्रभा खड्गी श्रेष्ठले नेपालको महिला आन्दोलनमा स्वर्गीय मङ्गलादेवी सिंहको महत्वपूर्ण भूमिका रहेको बताइन् ।

पार्टीका केन्द्रीय सदस्य एवं कार्यक्रमका संयोजक डा. डिला सङ्ग्रौलाले संविधानले व्याख्या गरेको अधिकारलाई पार्टीले लागू गर्नुपर्ने धारणा राखिन् । स्थानीय तहको निर्वाचनमा प्रमुख र उपप्रमुखमध्ये एक महिला हुनुपर्ने व्यवस्था गरेजस्तै कांग्रेसभित्र पनि सभापति वा उपसभापति एक महिला हुनुपर्ने व्यवस्था गर्नुपर्ने प्रस्ताव उनले गरिन् ।