पेट्रोलियम पदार्थमा अत्यधिक मूल्यवृद्धिका कारण अन्य सामग्रीमा समेत चरम महँगी बढेपछि सरकारले इन्धनमा लगाउँदै आएको करमा कटौती गर्ने भएको छ ।

उद्योग वाणिज्य तथा आपूर्तिमन्त्री दिलेन्द्रप्रसाद बडूले सरकारले करमा कटौती गर्दै पेट्रोलियम पदार्थको मूल्य घटाइएको जनाएका छन् ।

शनिबार आयोजित पत्रकार सम्मेलनमार्फत् मन्त्री बडूले पेट्रोलमा २० रुपैयाँ र डिजेलमा २८ रुपैयाँ कर कटौती गरेको जानकारी दिँदै कर कटौती भएपछि अब डिजेल प्रतिलिटर १६४ र पेट्रोल १७९ रुपैयाँ पर्ने बताएका छन् । आज (शनिबार) राति १२ बजेदेखि इन्धनमा कर घटाउने सरकारको घोषणालाई नेपाल आयल निगमले लागू गर्ने बताइएको छ । यतिबेला पेट्रोल प्रतिलिटर १९९ रुपैयाँ र डिजल तथा मट्टितेल प्रतिलिटर १९२ रुपैयाँमा कारोबार भइरहेको छ ।

अत्यधिक मूल्यवृद्धि गरेपछि कर कटाएर भएपनि इन्धनको मूल्य घटाउन सरकारलाई चौतर्फी दबाब परेको थियो ।