स्विट्जरल्यान्डलाई १-० ले पराजित गर्दै पाँच पटकको विश्वविजेता ब्राजिल एक खेलअघि नै कतार विश्वकप २०२२ को नकआउट चरणमा प्रवेश गरेको छ । दोहास्थित ९७४ मैदानमा कासेमिरोले खेल सकिन सात मिनेटअघि गरेको गोलमा ब्राजिल विजयी भएको हो ।

स्विस गोलकिपर यान सोमर र रक्षापंक्तिले उत्कृष्ट प्रदर्शन गरेपछि ब्राजिल कठिन जित निकाल्न सफल भएको हो । कासिमिरोले रोड्रिगोको पास सदुपयोग गरेका थिए । यसअघि खेलको ६५औं मिनेटमा भिनिसियस जुनियरको गोल अफसाइड भएको थियो ।

लगातार दोस्रो जितपछि ब्राजिल समूह ‘जी’बाट एक खेलअगावै अन्तिम १६ मा प्रवेश गरको छ । पहिलो खेलमा उसले सर्बियामाथि २–० को जित हासिल गरेको थियो ।

दुई खेलमा तीन अंकसहित स्विट्जरल्यान्ड दोस्रो स्थानमा छ । समूहमा सोमबारै चाँडो गरि सम्पन्न खेलमा क्यामरुन र सर्बियाले ३–३ को बराबरी खेलेका थिए ।

समूहको अन्तिम खेलमा शनिबार ब्राजिलले क्यामरुन तथा स्विट्जरल्यान्डले सर्बियासँग प्रतिस्पर्धा गर्नेछन् । ब्राजिल नकआउट चरणमा पुगिसकेको अवस्थामा बाँकी तीनवटै टोलीको अन्तिम १६ पुग्ने सम्भावना भने जीवित छ ।

ब्रुनोको दुई गोलप्ररित पोर्चुगल नकआउट चरणमा

यस्तै, उरुग्वेलाई पराजित गर्दै पोर्चुगल कतार विश्वकप २०२२ को नकआउट चरणमा स्थान बनाउन सफल भएको छ । लुसेल मैदानमा प्राप्त २–० को जितसँगै पोर्चुगल एक खेलअघि नै अन्तिम १६ मा पुगेको हो ।

खेलको ५४औं मिनेटमा ब्रुनोले बक्सबाहिरबाट ‘टप कर्नर’मा उत्कृष्ट फिनिसिङ गरेका थिए । ब्रुनोको सटलाई क्रिस्टियानो रोनाल्डोले बक्सभित्रबाट हेड गर्न भ्याएका थिएनन् । खेलको इन्जुरी समयमा ब्रुनोले नै पेनाल्टीमा गोल गर्दै पोर्चुगलको जित सुनिश्चित गरेका थिए ।

खेलमा उरुग्वेले उत्कृष्ट प्रर्दशन गरेपनि फिनिसिङमा चुकेको थियो । रोड्रिगो बेन्टचरले पहिलो हाफमा गरेको प्रहार गोलरक्षक डिअगो कोस्टाले सेभ गरे । वैकल्पिक खेलाडी म्याक्सि गोमेजको प्रहार पोष्टमा लाग्यो । खेलको अन्तिम समयमा पोर्चुगलका ब्रुनोको प्रहार पोस्टमा लाग्दा ह्याट्रिकबाट टाढा रहे ।

खेलमा क्रममा समर्थक मैदान प्रवेश गर्दा केहि समय रोकिन पुग्यो । मैदान छिरेका समर्थकले टिसर्टको अघिल्लो भागमा ’सेभ युक्रेन’ र पछिल्लो भागमा ‘रेस्पेक्ट फर इरानीयन वुमेन्स’ लेखेर मैदानमा कुदिरहेका थिए ।

खेलसँगै समूह ‘एच’दुई खेलबाट ६ अंक बनाएको पोर्चुगल सिधै प्रिक्वाटरफाइनलमा स्थान बनाएको छ । पराजित उरुग्वेको सम्भावना भने कायम छ । अन्तिम खेलमा घानालाई पराजित गरेमा उरुग्वेको सम्भावना रहन्छ । समूहमा घानाको तीन अंक रहँदा उरुग्वे र दक्षिण कोरियाको एक-एक अंक छ ।