भारत सरकारको अनुदान सहयोगमा नेपालमा शिक्षा, स्वास्थ्य सेवा तथा खानेपानी क्षेत्रसँग सम्बन्धित तीनवटा महत्वपूर्ण सामुदायिक विकास परियोजना अघि बढाउन नेपालस्थित भारतीय राजदूतावास र सङ्घीय मामिला तथा सामान्य प्रशासन मन्त्रालयबीच समझदारीपत्रमा हस्ताक्षर भएको छ ।
समझदारीअनुसार उदयपुर जिल्लामा श्री जनता बेलका माध्यमिक विद्यालयको विद्यालय भवन निर्माण, सोलुखुम्बु जिल्लामा न्गोङ्गा थेन्चोक छोलिङ्ग ध्यान केन्द्रको निर्माण र धादिङ जिल्लामा लिस्नेखोला टिकासुङ दाङचेत झार्लाङ खानेपानी परियोजनाको निर्माण गरिने छन् । यी तीन परियोजना कूल अनुमानित १० करोड १७ लाख लागतमा कार्यान्वयनमा ल्याइने बताइएको छ ।
उल्लिखित तीन परियोजनाहरूको निर्माणपछि सम्बन्धित स्थानीय समुदायका लागि राम्रो शिक्षा, स्वास्थ्य सुविधा तथा सुरक्षित खानेपानी उपलब्ध हुनुका साथै नेपाली जनताको जीवनस्तरमा सुधार ल्याउन महत्वपूर्ण योगदान पुग्नेछ ।
ज्ञातव्य छ, सन् २००३ यता भारतले नेपालमा ५३२ भन्दा बढी उच्च प्रभावी सामुदायिक विकास परियोजनाहरू अघि बढाइसकेकोमा स्वास्थ्य, शिक्षा, खानेपानी, कनेक्टिभिटि, सरसफाइ र अन्य सार्वजनिक सुविधाका क्षेत्रमा नेपालका सातै वटा प्रदेशमा ४७६ वटा परियोजना सम्पन्न भइसकेका छन् ।
प्रतिक्रिया