अविश्वास प्रस्ताव ‘सन् २०२४ को लोकसभा निर्वाचन विजयका लागि आफ्नो दललाई भगवानको आशीर्वाद’ भएको मोदीको भनाइ

भारतको मोदी सरकारविरुद्ध विपक्षी दलहरुले ल्याएको अविश्वासको प्रस्ताव बिहीबार ध्वनिमतको आधारमा परास्त भएको छ । तीन दिनसम्म चलेको बहसको अन्त्यमा प्रधानमन्त्री नरेन्द्र मोदीको चर्को भाषणपछि संसदमा अविश्वासको प्रस्ताव परास्त भएको हो ।

भारतीय काङ्ग्रेस पार्टीका नेता राहुल गान्धीसहित विपक्षी सांसदहरू सदनबाट बाहिर निस्केको केही समयपछि सभामुखले आह्वान गरेको ध्वनिमतमा उक्त प्रस्ताव पराजित भएको हो । उक्त दृष्य भारतीय टेलिभिजनहरूमा देखाइएको छ ।

भारतीय प्रधानमन्त्री नरेन्द्र मोदीले लोकसभामा अविश्वासको प्रस्तावमाथिको बहसको जवाफ दिइरहेका बेला विपक्षी दलका सदस्यले उनको सम्बोधन बहिस्कार गर्दै बिहीबार संसद् भवनबाट बाहिरिएका थिए ।

प्रधानमन्त्रीले विभिन्न विषयमा विपक्षीले उठाएको सवालको जवाफ गरिरहँदा विपक्षी गठबन्धन आई.एन.डी.आई.ए. समूहका सदस्यहरूले सम्बोधनलाई बहिस्कार गरी सदनबाट बाहिरिएका हुन् । उनीहरूको उद्देश्य प्रधानमन्त्रीको सम्बोधनका क्रममा विपक्षी बेन्चहरू खाली गर्ने रहेको देखिएको थियो ।

आफ्नो भाषणको क्रममा प्रधानमन्त्री मोदीले विपक्षी दलहरूमाथि कटाक्ष गर्दै अविश्वासको मत आफ्नो दल वा गठबन्धनलाई सन् २०२४ को लोकसभा निर्वाचन विजयका लागि भगवानको आशीर्वाद भएको अभिव्यक्ति दिएका थिए ।

लोकसभामा अविश्वासको प्रस्तावमाथिको बहसको जवाफ दिँदै प्रधानमन्त्री मोदीले भने, ‘भारतीय जनताले हाम्रो सरकारमाथि पटक-पटक विश्वास देखाएका छन् । म यहाँ देशका करोडौं जनताप्रति कृतज्ञता व्यक्त गर्न आएको हुँ ।’

प्रधानमन्त्री मोदीले सन् २०१९ को लोकसभा चुनावअघि सन् २०१८ मा पनि विपक्षी दलले आफ्नो सरकारविरुद्ध अविश्वासको प्रस्ताव ल्याएको स्मरण गरे । “परमेश्वर धेरै दयालु हुनुहुन्छ र कुनै माध्यमद्वारा बोल्नुहुन्छ । विपक्षले सरकारविरूद्ध अविश्वासको प्रस्ताव ल्याएको छ । यो भगवानको आशीर्वाद हो भन्ने मलाई विश्वास छ ।”

अविश्वासको प्रस्तावमाथि गत मंगलबारदेखि बहस सुरु भएको थियो ।