भारतको आन्ध्र प्रदेशस्थित भिजियानगरम जिल्लामा दुई यात्रुवाहक रेल एकआपसमा ठोक्किएका छन् । उक्त रेल दुर्घटनामा नौ यात्रुको मृत्यु भएको छ भने करिव ४० यात्रु घाइते भएका छन् । घाइतेहरुको स्थानीय अस्पतालमा उपचार भइरहेको जनाइएको छ ।

प्रधानमन्त्री नरेन्द्र मोदी र आन्ध्र प्रदेशका मुख्यमन्त्री वाईएस जगनमोहन रेड्डीले दुर्घटनाप्रति दुःख व्यक्त गरेका छन् भने मृतकको परिवारका लागि क्षतिपूर्ति घोषणा गरिएको छ ।

दुर्घटना परेका रेलहरुमा ०८५३२ विशाखापट्टनम-पलासा यात्री र ०८५०४ विशाखापट्टनम-रायगडा यात्री विशेष रहेको इण्डियन रेलवेले जनाएको छ।

यो टक्करका कारण धेरै रेलको रुट परिवर्तन गर्नुपरेको थियो । यो रेल दुर्घटना भएको लाइन हावडा–चेन्नई लाइन भनिन्छ। अहिले रेलमार्ग सफा गर्ने काम भइरहेको छ ।