सुत्केरी मृत्युको विषयलाई लिएर सिद्धार्थ बाल तथा महिला अस्पताल (आम्दा) बुटवलका मेडिकल सुपरिटेन्डेन्ट डा. राजेन्द्र बस्यालमाथि मृतकका आफन्तहरुले हातपात गरेका छन् ।

मंगलबार (१२ मंसिर) दोस्रो बच्चा सुत्केरी गराउने क्रममा अस्पताल भर्ना गरिएकी गुल्मी ठूलो लुम्पेककी ३२ वर्षीया भवानी रास्कोटीको मृत्यु भएसँगै विवाद बढेको थियो । सो क्रममा मृतकका आफन्तहरुले अस्पतालका चिकित्सक मेसु डा. बस्यालमाथि कुटपिट गरेका हुन् । नवजात शिशु भने सकुशल भएको अस्पताल ब्यवस्थापनले जनाएको छ ।

लुम्बिनी चिकित्सक संघका सचिव डा. सन्तोष पोखरेलले उपचार गर्ने चिकित्सकमाथि हातपात हुनु दुभाग्यपूर्ण भएको बताए । चिकित्सकको सुरक्षाको ग्यारेन्टी नभएसँग आफुहरुले उपचार रोकेर विरोध गर्ने उनको भनाइ छ ।

कुटपिटबाट घाइते डाक्टरको लुम्बिनी प्रादेशिक अस्पतालको आइसियू कक्षमा उपचार भइरहेको छ ।