नेपाल नागरिक उड्डयन प्राधिकरण (क्यान)ले ‘ग्राउण्ड ह्याण्डलिङ’ कार्य (भूमिस्थ प्रबन्ध सेवा) प्रतिस्पर्धाका माध्यमबाट छनोट गर्ने भएको छ ।

हाल नेपाल एयरलाइन्सले गर्दै आएको ग्राउण्ड ह्याण्डलिङ सेवाको लागि अन्य एयरलाइन्सले पनि प्रतिस्पर्धा गर्न सक्ने गरी निर्णय भएको र तत्काल उक्त प्रक्रिया सुरु हुने प्राधिकरणका प्रवक्ता जगन्नाथ निरौलाले जानकारी दिएका छन् ।

प्राधिकरणको यो निर्णयसँगै हाल त्रिभुवन अन्तर्राष्ट्रिय विमानस्थलमा राष्ट्रिय ध्वजाबाहक नेपाल वायुसेवा निगम (नेपाल एयरलाइन्स) ले गर्दै आएको ग्राउण्ड ह्याण्डलिङ सेवा खोसिन सक्ने अनुमान गरिएको छ ।

प्राधिकरणले सेवा शुल्क नियमावली २०७८ को नियम ५ (२) बमोजिम ग्राउण्ड ह्याण्डलिङ सेवा प्रतिस्पर्धाका माध्यमबाट छनोट भएको संस्थामार्फत गराउने निर्णय गरेको हो ।

‘मापदण्ड पुगेका एयरलाइन्सले पनि ग्राउण्ड ह्याण्डलिङ सेवाको प्रतिस्पर्धामा भाग लिन पाउनेगरी निर्णय भएको छ, यसले नयाँ एयरलाइन्सले पनि अवसर पाउछन्’, प्रवक्ता निरौलाले भनेका छन् ।

निगमको मुख्य आम्दानीको स्रोत रहेको ग्राउण्ड ह्याण्डलिङ सेवा बन्द भएमा निगम थप आर्थिक रुपमा कमजोर हुने जनाइएको छ ।