नेकपा (एमाले)का अध्यक्ष केपी शर्मा ओलीले प्रधानमन्त्री प्रचण्डलाई प्रतिनिधिसभाको बैठकमा विश्वासको मत दिन आफ्ना सांसदलाई निर्देशन दिएका छन् ।

सो पार्टीको संसदीय दलको बैठकलाई मंगलबार सम्बोधन गर्दै अध्यक्ष ओलीले पुरानो गठबन्धनले देश बर्बाद बनाएकाले सत्तामा जाने हतारो नभइ देशको आवश्यकताका आधारमा नयाँ गठबन्धन बनाएको र यसले एक प्रकारको आशा बढाएको जिकिर गरे ।

आफूहरूकै पहलकदमीमा नयाँ गठबन्धन बनेको प्रष्टिकरण दिँदै यसमा कुनै विदेशी वा छिमेकी मुलुकलाई नजोड्न उनले आग्रह गरे । पूर्व प्रधानमन्त्री ओलीले वामपन्थी पार्टीहरूको अगुवाइमा बनेको नयाँ गठबन्धन टिकाउनु आफूहरूको दायित्व भएकोमा जोड दिए ।

यही फागुन २१ गते नेपाली कांग्रेससँगको गठबन्धन तोडेर नेकपा (माओवादी केन्द्र) का अध्यक्ष प्रधानमन्त्री प्रचण्ड नेतृत्वको सरकारमा नेकपा (एमाले), राष्ट्रिय स्वतन्त्र पार्टी र जनता समाजवादी पार्टीले नयाँ गठबन्धनको सहमति गरेका थिए । उक्त सहमतिको शृङ्खलामा अहिले नेकपा (एकीकृत समाजवादी) पनि जोडिएको छ ।

एमालेसँगको नयाँ गठबन्धनमा बाँधिएका प्रधानमन्त्री प्रचण्डले आज (फागुन ३०) संसदबाट विश्वासको मत लिँदैछन् ।