हालैमात्र इंग्ल्याण्डका एक १११ वर्षीय पुरुषलाई विश्वको सबैभन्दा वृद्ध पुरुष घोषित गरिएको थियो, तर पेरु सरकारले आफ्नो देशमा १२४ वर्ष उमेरको जीवित व्यक्ति रहेका र उनी नै विश्वको सबैभन्दा वृद्ध जीवित व्यक्ति भएको दाबी गरेको छ ।
पेरुको दाबीअनुसार मासिको भनेर चिनिने मार्सेलिनो अबाद टोलेन्टिनो नामका व्यक्ति नै विश्वका सबभन्दा धेरै उमेरका ब्यक्ति हुन्, जो पेरुको हुआनुकोको पहाडी क्षेत्रमा बस्छन् । ह्वानुको क्षेत्रको मौसम नै मार्चेलिनोको लामो आयुको रहस्य रहेको पनि बताइएको छ ।
सरकारले विश्वको सबैभन्दा जेठो व्यक्ति हुनुका साथै मार्सेलिनो अहिलेसम्म सबैभन्दा लामो आयु बाँच्ने एकमात्र व्यक्ति भएको प्रेस विज्ञप्तिमार्फत जिकिर गरेको छ ।
‘हुआनुकोको वनस्पति र जीवजन्तुको शान्तिको बीचमा मार्सेलिनोले स्वस्थ जीवनशैली र आन्तरिक शान्ति फेला पारेका छन्, जुन उनको राम्रो स्वास्थ्य र व्यवहारमा झल्किन्छ । त्यसैले उनले आफ्नो जीवनको १२ दशक लचिलोपन र कौशलताका साथ बिताउन सफल भए’, हालै जारी गरिएको विज्ञप्तिमा उल्लेख छ ।
हिउँले ढाकिएका पहाडहरू, तातो उपत्यका र अमेजन जंगलहरूका साथै हुआनुको शहर पहाड र हरियो जंगलले घेरिएको छ। पेरुको यो सहरमा रहेका पुरातात्विक भग्नावशेष र मन्दिरहरू हेर्न टाढा टाढाबाट पर्यटक आउँछन्।
सरकारी दाबीअनुसार मार्सेलिनोले अप्रिल ५ मा आफ्नो १२४औं जन्मदिन मनाएका थिए । उनी पेशाले किसान भएको बताइएको छ । उनको जन्म सन् १९०० मा भएको जनाइएको छ । पेरुका अधिकारीहरूले मार्सेलिनोलाई गिनिज बुक अफ ववर्ल्ड रेकर्डसमा नाम दर्ता गराउन सरकारले सहयोग गरिरहेको जनाएका छन् । विज्ञहरूको टोलीले मार्सेलिनोको जन्मसँग सम्बन्धित कागजातहरूपनि जाँच गर्नेछ ताकि यो उपलब्धिलाई कुनै शंका नगरी प्रमाणित गर्न सकियोस् ।
यसबारे न्यूयोर्क पोस्टमा प्रकाशित समाचार अनुसार सन् २०१९ मा छागला नामक सानो गाउँमा पहिलो पटक मार्सेलिनोको परिचय खुलाइएको थियो । त्यसपछि सरकारले उनलाई परिचयपत्र र पेन्सन उपलब्ध गराएको थियो । मार्सेलिनोले आफ्नो आहारमा फलफूल र मासु समावेश गरेको बताइएको छ । उनी कोका पात चपाउन पनि मन पराउँछन्।
ज्ञातव्य छ, केही दिनअघिमात्रै इङ्गल्याण्डका जोन अल्फ्रेड टिनिसवुडलाई आधिकारिक रूपमा विश्वको सबैभन्दा वृद्ध जीवित व्यक्ति घोषित गरिएको थियो । जोन १११ वर्षका छन् । सबैभन्दा लामो समय बाँच्ने व्यक्तिको कीर्तिमान उनको नाममा गिनिज बुकमा दर्ता भएको छ ।
प्रतिक्रिया