नागरिकता कीर्ते गरेको कसुरमा कान्तिपुर मिडिया ग्रुपका अध्यक्ष कैलाश सिरोहियाविरुद्ध जिल्ला प्रहरी कार्यालय धनुषाले पक्राउ पुर्जी जारी गरेको छ ।

सिरोहियालाई पक्राउ गर्न अदालतबाट अनुमति लिई पुर्जी जारी गरिएको धनुषा जिल्ला अदालतका सूचना अधिकारी डम्बरप्रसाद घिमिरेले जानकारी दिएका छन् ।

सर्लाहीका इन्द्रजीतप्रसाद महतोले धनुषा जिल्ला प्रहरी कार्यालयमा सिरोहियाको नागरिकता कीर्ते रहेको भन्दै उजुरी दर्ता गरेका थिए । यस मुद्दामा सिरोहियालाई पक्राउ गर्न न्यायाधीश चित्रबहादुर गुरुङको २ नम्बर इजलासले आज (८ जेठ) अनुमति दिएको घिमिरेको भनाइ छ ।

सिरोहियाको दुईवटा नागरिकता विभिन्न संस्थामा पेश भएको र नागरिकता नम्बर पनि नक्कली रहेको तथा अर्कोसँग मिलेको सन्दर्भले पछिल्लो समय मिडिया तथा सामाजिक सञ्जालमा चर्चा पाउँदै आएको छ ।