शिकारीको गोली लागेर दार्चुलामा एक जनाको मृत्यु भएको छ । नौगाड गाउँपालिका-१ लक्सेरी नागु बस्ने अन्दाजी ५५ वर्षीय धङ्के डडालको भरुवा बन्दुकको गोलीबाट मृत्यु भएको हो ।

नौगाड गाउँपालिका-१ लक्सेरीका ४५ वर्षीय जयसिंह डडालले मल्लासेली भन्ने वनमा सिकार खेल्ने क्रममा बन्दुक पड्काएकोमा टाउकोमा गोली लागेका डडालको घटनास्थलमै मृत्यु भएको जिल्ला प्रहरी कार्यालय दार्चुलाका सूचना अधिकारी एवं प्रहरी निरीक्षक ज्ञानेन्द्रबहादुर सिंहले जानकारी दिएका छन् ।

स्थानीयका अनुसार डडालले सोही वनमा पासो थापिरहेका थिए । गोली हान्ने जयसिंहलाई नियन्त्रणमा लिई घटनाबारे अनुसन्धान भइरहेको प्रहरीले जनाएको छ ।