नेपाल प्रहरीले भिजिट भिसामा एकजना पीडितलाई कुवेत पुऱ्याइ मानव बेचबिखन गरेको अभियोगमा पक्राउ गरी सार्वजनिक गरेको छ ।

पक्राउ पर्नेमा मोरङको रङ्गेली नगरपालिका-३ का ५७ वर्षीय कृष्ण अधिकारी भन्ने झयन्द्रकुमार अधिकारी रहेको केन्द्रीय प्रहरी प्रवक्ता एवं प्रहरी नायब महानिरीक्षक दानबहादुर कार्कीले जानकारी दिएका छन् ।

बेचबिखन गरेको भन्ने पीडितको उजुरीका आधारमा मानव बेचबिखन अनुसन्धान ब्यूरोको टोलीले बुधबार ललितपुर महानगरपालिका-२४ बाट निजलाई पक्राउ गरेको प्रहरी प्रवक्ता कार्कीको भनाइ छ ।

अधिकारीले पीडितलाई दुबईको कम्पनीमा मासिक तलब रु ४० हजारसम्म हुने काममा लगाइदिने प्रलोभन देखाई रु दुई लाख नगद लिई दुबईमा अर्का अभियुक्तले भेट गरी आफू बस्ने कोठामा लगि बन्धक बनाएर घरेलु काममा लगाइ यौनशोषणसमेत गरीकन जबर्जस्ती गर्भपतन गराएको पीडितको आरोप छ ।

यसैगरी, युएईमा भन्दा कुबेतमा राम्रो तलब हुन्छ भनेर विसं २०८० वैशाख २८ गते दुबईबाट कुवेत पुऱ्याइ सो एजेन्टले अर्कोलाई जिम्मा लगाएको र निजले पीडितलाई बन्धक बनाई श्रम र यौन शोषणसमेत गरेको प्रारम्भिक अनुसन्धानको क्रममा खुल्न आएको प्रवक्ता कार्कीले जानकारी दिए । पीडितले नेपाल फर्काइदिन अनुरोध गर्दा रु ६ लाख ७५ हजार रकम बुझाउन भनेपछि आफन्तमार्फत उक्त रकम बुझाई विसं २०८० मङ्सिर ३ गते नेपाल फर्कन सफल भएको प्रहरीले जनाएको छ ।

पक्राउ परेका अधिकारीमाथि मानव बेचबिखन तथा ओसारपसार मुद्दामा जिल्ला अदालत काठमाडौंबाट पाँच दिन म्याद थप अनुमति लिई आवश्यक अनुसन्धान सुरु गरिएको प्रहरीले जनाएको छ ।