पोखरा रोयल बचत तथा ऋण सहकारी संस्था लिमिटेडले आर्थिक मन्दीका कारण समस्यामा परेका सदस्यहरुलाई लक्षित गरी एकल बिन्दुमा ऋण प्रवाह गरिरहेको छ ।

संस्थाका ऋण विभाग प्रमुख परमेश्वर दाहालका अनुसार मिसन संस्थाले लागु गरेको १०० योजना अनुसार ९.९९ प्रतिशत ब्याजदरमा रु. ५ लाखदेखि १ करोडसम्मको ऋण प्रवाह भइरहेको छ । यो योजना १०० दिनसम्म लागु हुने र यस योजना अन्तर्गत साँवा एवं व्याज नियमित भुक्तानी गरेमा ऋण लिएको १ वर्षसम्म ब्याज वृद्धि नहुने अनि समयअनुसार ब्याजदर कम भएमा भने सोहीअनुसार कम हुने स्पष्ट पारे ।

विगत २ दशक बढीदेखि पोखरालाई कार्यथलोको रुपमा कारोबार गरिरहेको सहकारीको कास्की, स्याँङ्जा, तनहँु, लमजुङ्ग र पर्वत गरि ५ जिल्ला कार्यक्षेत्र, प्रधान कार्यालयसहित ४ वटा सेवा कार्यालय र ९३५६ जना सदस्य रहेका छन् ।

संस्थाले हाल १ हजार ३०० बढीलाई व्यापार व्यवसाय, कृषि, पर्यटन, लघुउधम, वैदेशिक रोजगार, शैक्षिक र घरायसी लगायतको शीर्षकमा १ अर्ब ६८ करोड बढी लगानी गरिरहेको संस्थाका सूचना अधिकारी मिलन ढकालले बताए । संस्थाले ग्रामीण महिलाहरुलाई लक्षित गरी सहकारी समूह कर्जा समेत सञ्चालन गरिरहेको छ । हाल कास्की, तनहुँ र स्याङ्जाका करिब ९ वटा पालिकामा सञ्चालित कार्यक्रममा करिब २ हजार महिलाहरु आवद्ध रहेका छन् ।