कांग्रेसले पाँच र एमालेले चार मन्त्रालय लिने

गण्डकी प्रदेशमा मन्त्रालय विभाजन गरेर नौ वटा बनाइएको छ । आज (१६ भदौ) बसेको मन्त्रिपरिषद् बैठकले नौ वटा मन्त्रालय बनाउने निर्णय गरेको मुख्यमन्त्री सुरेन्द्रराज पाण्डेले पत्रकार सम्मेलनमार्फत जानकारी दिए ।

नेपाली कांग्रेस र नेपाल कम्युनिष्ट पार्टी (एमाले) बीचको सहमतिअनुसार नौ वटा मन्त्रालय बनाइएको जानकारी दिँदै उनले सङ्घीय गठबन्धनअनुुसार नै अघि बढेको बताए। मुख्यमन्त्री पाण्डेका अनुसार नौ वटा मन्त्रालयमध्ये कांग्रेसले पाँच र एमालेले चार मन्त्रालय लिनेछन् । प्रदेशमा उद्योग, पर्यटन, वन तथा वातावरण र सामाजिक विकास तथा स्वास्थ्य मन्त्रालय विभाजन गर्ने निर्णय गरिएको हो ।

मुख्यमन्त्री पाण्डेले वातावरण मन्त्रालय र स्वास्थ्य मन्त्रालयअन्तर्गत यसअघि दुई/दुईवटा सङ्गठन संरचना रहेकाले सोहीअनुसार विभाजन गरिएको जानकारी दिँदै भनेका छन्, ‘यी मन्त्रालय एउटै भए पनि सङ्गठन संरचना दुईवटा थिए र सचिव पनि अलग अलग थिए । त्यसलाई अलग अलग गरेर नौवटा मन्त्रालय कायम गर्ने निर्णय गरेका छौँ ।’

अब चाँडै नै एमालेका तर्फबाट चारजना मन्त्रिपरिषदमा समावेश हुने र सङ्घीय गठबन्धनअनुसार गठबन्धन अघि बढिने मुख्यमन्त्री पाण्डेको भनाइ छ ।

^{_{photo: rss}}