रवि लामिछाने नेतृत्वको राष्ट्रिय स्वतन्त्र पार्टीका पूर्वसांसद ढाकाकुमार श्रेष्ठलाई प्रहरीले नियन्त्रणमा लिएको छ । लागुऔषधिको अवैध कारोबारमा संलग्न रहेको अभियोगमा श्रेष्ठलाई प्रहरीले नियन्त्रणमा लिएको हो ।

प्रहरीले जनाएअनुसार जिल्ला कास्की पोखरा महानगरपालिका वडा नं. २ स्थित बाग्लुङ बसपार्कबाट गत साउन ३ गते रोल्पा त्रिवेणी गाउँपालिका वडा नं. ७ स्थायी घर भइ हाल पोखरा महानगरपालिका वडा नं. ४ नालामुख बस्ने ४२ वर्षीय प्रकाश थापा मगरलाई TRUPAIN (Tapentadol) नामको लागुऔषधसहित पक्राउ गरी कानुनसम्मत अनुसन्धान भइरहेकोमा निज प्रकाश थापा मगरले उक्त लागूऔषध पोखरा महानगरपालिका वडा नं. ९ पृथ्वीचोकस्थित दिया फार्मेसीबाट खरिद गरी ल्याएको बयान दिएका थिए ।

सो बयानका आधारमा प्रहरीले कास्की जिल्ला अदालतबाट कानूनबमोजिम पक्राउ अनुमति लिइ उक्त दिया फार्मेसीका संचालक रहेका रास्वपाका पूर्वसांसद श्रेष्ठलाई हिरासतमा लिएको हो । पोखरा महानगरपालिका वडा नं. २४ बस्ने वर्ष ४८ का ढाकाकुमार श्रेष्ठबारे थप अनुसन्धान प्रक्रिया अगाडि बढाइएको प्रहरीले जनाएको छ ।