सरकारलाई दबाब दिने उद्देश्यले काठमाडौंको माइतीघरमा आठ दिनदेखि उभिँदै आएका नेत्र चापागाईंले आन्दोलन स्थगित गरेका छन् । शिक्षा, विज्ञान तथा प्रविधिमन्त्री विद्या भट्टराईले भेट गर्दै उनका माग पूरा गर्ने प्रतिबद्धता जनाएपछि आन्दोलन स्थगित गरिएको हो ।

मन्त्री भट्टराईले सोमबार (२२ पुस) चापागाईंसँग भेट गरी शिक्षा क्षेत्र सुधारका प्रक्रिया अघि बढिसकेकाले शङ्का नगर्न अनुरोध गरिन् । आर्थिक वर्ष २०८१र८२ बजेट तर्जुमा गर्दा हालको सरकार नरहेका कारण सबै विषय सम्बोधन गर्न कठिन रहेको उनको भनाइ थियो । तथापि, हाल विपदबाट क्षति भएका विद्यालयको पुनःनिर्माण आवश्यक रकम व्यवस्थापनका लागि अर्थ मन्त्रालयमा पेस भइसकेको उनले जानकारी दिइन् ।

मन्त्री भट्टराईले संस्थागत विद्यालयमा सरकारले तोकेबमोजिम छात्रवृत्ति दिन अनिवार्य गराइएको, स्थानीय तहलाई शिक्षा कोष स्थापना गर्न उत्प्रेरित गराइने, शिक्षकको उपचारमा छुटको लागि स्वास्थ्य मन्त्रालयमा अनुरोध गरिसकिएको पनि जानकारी गराइन् ।

उक्त भेटमा प्रतिनिधिसभाको शिक्षा, समितिका सभापति अमरबहादुर थापाले शिक्षाको मोडेल सुधारका लागि समितिमा छलफल गरिएको र अबको शिक्षाको मोडेल मुलुकमै बसेर केही गर्न सक्ने खालको हुनुपर्ने भएकाले सोही अनुसार शिक्षा ऐन ल्याउन नागरिकको धारणा लिन खोजेको अवगत गराए ।

शैक्षिक क्षेत्र सुधारको मागसहित आन्दोलन सुरु गरेका चापागाईं सातै प्रदेशमा दुई/दुई घण्टा उभिएर काठमाडौं आएका थिए । काठमाडौंमा उनी उभिन थालेको सोमबार आठौँ दिन थियो । खुट्टा सुन्निएपछि उनले वैशाखीको सहारामा उभिएर आन्दोलनलाई निरन्तरता दिएका थिए ।

_{^{photo: rss}}