एएफसी एसियन कपको पहिलो खेलमा नेपाल मलेसियासँग पराजित

एएफसी एसियन कप २०२७ को तेस्रो चरणअन्तर्गतको पहिलो खेलमा नेपाल मलेसियासँग पराजित भएको छ ।

मलेसियाको सुल्तान इब्राहिम स्टेडियम मंगलबार (१२ चैत) सप्पन्न खेलमा मलेसियासँग नेपाल २–० गोलअन्तरले पराजित भएको हो । यो जितसँगै मलेसियाले तीन अङ्क जोडेको छ । खेलको २९औँ मिनेटमै हेक्टर हेभलले गोल गर्दै मलेसियालाई पहिलो अग्रता दिलाए ।

त्यसपछि खेलको ७१औँ मिनेटमा मलेसियाका अर्का खेलाडी लाभेर कोर्बिन–अङ्गले गोल गर्दै टोलीको अग्रता दोब्बर बनाए । त्यसपछि खेलमा गोल हुन सकेन र मलेसियाले नेपालमाथि २–० को जित निकाल्यो ।

यस पटकको छनोटमा एसियाका २४ टिमलाई ६ समूहमा विभाजित गरिएको छ, जसमा नेपाल एफमा रहेको छ । नेपालको समूहमा मलेसियासँगै भियतनाम र लाओस छन् । ‘होम एण्ड अवे’ प्रणालीमा खेलाइने छनोटपछि प्रत्येक समूहको शीर्ष टोली एसियन कपमा छनोट हुनेछ ।

आजको खेल नेपालमा हुनुपर्ने भए पनि एसियाली फुटबल महासङ्घ (एएफसी)ले दशरथ रङ्गशालालाई मान्यता नदिएपछि मलेसियामा भएको बताइएको छ ।