पत्रकार पर्वतराज घिमिरेमाथि ज्यान मार्ने धम्कीप्रति पत्रकार महासंघ काठमाडौं शाखाद्वारा भर्त्सना

नेपाल पत्रकार महासंघ काठमाडौं शाखाले आफ्ना सदस्य पत्रकार पर्वतराज घिमिरेमाथि आएको ज्यान मार्ने धम्कीप्रति घोर भर्त्सना व्यक्त गरेको छ ।

काठमाडौंका मेयर बालेन्द्र साहसम्बन्धी समाचार प्रसारण भएपछि मेयर साहका भिनाजु बताइने सुवास साहले पत्रकार घिमिरेलाई फोनमार्फत अपशब्द प्रयोग गर्दै ज्यान मार्ने धम्की दिएका हुन् । धम्की दिइएको सन्दर्भ सार्वजनिक भएसँगै शाखाले यसलाई प्रेस स्वतन्त्रतामाथिको प्रत्यक्ष आक्रमणको रूपमा लिएको जनाइएको छ ।

शाखाका सचिव रमेश कुमार बोहोराद्वारा बुधबार (२२ असोज) जारी विज्ञप्तिमा भनिएको छ, ‘यो कुनै व्यक्तिगत रिसइवी होइन, स्वतन्त्र पत्रकारिता र अभिव्यक्तिको अधिकारमाथिको नियोजित हमला हो जसले लोकतान्त्रिक मूल्य र प्रेस स्वतन्त्रताको आधारभूत मर्मलाई चुनौती दिएको छ ।’

विज्ञप्तिमा ‘समाचारप्रति असन्तुष्टि भएमा प्रेस काउन्सिल नेपालमा उजुरी दिने कानुनी व्यवस्था हुँदाहुँदै धम्कीपूर्ण र आपराधिक व्यवहार गर्नु प्रेस आचारसंहिता र प्रचलित कानुनको ठाडो उल्लङ्घन हो’ भनिएको छ । शाखाले सुरक्षा निकायलाई घटनाको तत्काल अनुसन्धान गरी दोषीमाथि कानुनअनुसार कडा कारबाही गर्न र पत्रकारमाथि हुने धम्की तथा आक्रमणप्रति शून्य सहनशीलता अपनाउन सरकारसँग जोडदार माग गरेको छ ।

शाखाका सचिव बोहोराले थप भनेका छन्, ‘स्वतन्त्र प्रेस र निर्भीक पत्रकारिता लोकतन्त्रका मेरुदण्ड हुन् । पत्रकारको सुरक्षा सुनिश्चित गर्नु राज्यको प्राथमिक दायित्व हो ।’