✍ अनन्तश्री राजगुरु जगतगुरु वीरेन्द्र परमहंश ज्योतिषाचार्य

आजको पञ्चाङ्ग

श्रीशाके १९४७ नेपाल सं. ११४५ सिद्धार्थीनाम संवत्सर शरद ऋतु वि.सं. २०८२ कार्तिक ३ गते तद्अनुसार सन् २०२५ अक्टोबर २० तारिख सोमबार कार्तिक कृष्ण पक्षको चतुर्दशी १४ः५९ पर अमावश्या तिथि हस्ता नक्षत्र वैधृति योग चतुष्पाद करण आनन्दादिमा बज्र योग चन्द्रमा कन्या राशिमा भ्रमणशील रहनेछ । काठमाडौंमा सूर्योदय बिहान ६ः७ मा भयो र सूर्यास्त साँझ १७ः२८ बजे हुनेछ । कुकुरतिहार, नरकचतुर्दशी, लक्ष्मीपूजा, दीपमालिका, सुखरात्रि, बिहान झिसमिसेमा तेल लगाएर नुहाउने, बेलुकी ५ः३० देखि अमृत बेलामा दीयो बाल्ने, ७ देखि ८ः३० बीच वृष स्थिर लग्नमा लक्ष्मी पूजा ।

आजको राशिफल

मेष – मिश्रित फलदायी समय छ । श्रम धेरै गरे पनि उचित मूल्याङ्कन नहुन सक्छ । मुस्किलले गरेको आम्दानी फजुलमा खर्च हुने योग रहेकोले आर्थिक कारोबारमा विशेष सजग रहनुहोला । हतारको निर्णयले काम बिग्रन सक्छ । मान्यजनको उचित सुझाव पनि अप्रिय लाग्न सक्छ । यसका बाबजुद कर्मबल बढ्नेछ । रसरागात्मक क्रियाकलापमा मन जानेछ ।

वृष – आजको दिन फुर्सदिलो अनुभूति होला । मनमा रहेको कुनैपनि डरत्रासको भाव हटेर नियमित कार्यमा उत्साह बढ्नेछ । टाढाको यात्रा गर्ने अवसर आउला । प्रयत्न गर्दा मौकाको फाइदा लिन सकिनेछ । यात्रागत कार्यमा विशेष लाभ होला । आय वृद्धिको योग छ । आरोग्यबल बढ्नेछ । शत्रुपक्ष परास्त हुनेछ ।

मिथुन – आर्थिक विकाससित सम्बन्धित कार्यमा सफलता मिल्ने समय छ । दिगो फाइदा हुने काममा लगानी बढाउन सकिएला । सामर्थ्य वृद्धिका साथै नियमित कार्यमा मन जानेछ । आलोचकहरू प्रशंसा गर्न थाल्नेछन् । प्रेम सम्बन्धमा सुधार आउनुका साथै दाम्पत्य सम्बन्ध सुखद रहनेछ । मित्रहरूको साथ प्राप्त हुनेछ ।

कर्कट – अरुको विश्वास सजिलै जित्न सकिने समय छ । व्यापार–व्यवसायबाट राम्रै आम्दानी हुनसक्छ । घुमघाम, भेटघाट र मनोरञ्जनमा दिन बित्नेछ । मिष्ठान्न भोजन प्राप्तिको योेग छ । आजको दिन नसोचेको काम बन्ने देखिन्छ । यशवर्चश्व बढ्नेछ । साहसिक काममा आकर्षण बढ्ला ।

सिंह – आजको दिन मिहेनत बढी तर उपलब्धि कम हुने सम्भावना छ । स्वास्थ्य कमजोर रहनुका साथै खर्च बढ्ने योग छ । नयाँ तथा दीर्घकालीन योजना बनाउन पनि अनुकूल नहुन सक्छ । कुरा काट्नेहरू सल्बलाउनेछन् । गलत विचारहरुले काममा बाधा सिर्जना गर्ने सम्भावना छ । अरुको काममा ज्यादा समय खर्चनुपर्ने देखिन्छ । खेलकूद, भ्रमण जस्ता कार्यमा आकर्षण बढ्नेछ ।

कन्या – आजको दिन नयाँ ठाउँमा लगानीको वातावरण बनी मन हर्षित होला । भाग्य बलियो छ । परिश्रमले धेरै काम बन्नेछन् भने आर्थिक लगानी बढाउन अनुकूल समय छ । परोपकारी कर्ममा मन जानेछ । मनोरञ्जनमा भुलिने योग पनि छ । दाम्पत्यसुख वृद्धि हुनुका साथै आरोग्यता रहनेछ । साझेदारीको काममा विशेष लाभ होला ।

तुला – व्यापार-व्यवसायमा लाग्नेहरूलाई विशेष फाइदाको समय छ । रुचिका विषयमा लगानी बढाउन सकिएला । व्यवसायमा थप लगानी गर्दै हुनुहुन्छ भने ढुक्कले अघि बढ्न सकिनेछ । आयआर्जनको स्रोत फेला पर्नुका साथै वैदेशिक तथा ब्यापारिक कामकाजमा विशेष फाइदा होला । प्रेमसम्बन्ध र दाम्पत्यसुखको योग छ । स्वास्थ्य सबल रहनेछ ।

वृश्चिक – आजको दिन कामको सन्दर्भमा रमाइला व्यक्तित्वहरूसँग मित्रता बढ्ने देखिन्छ । मित्रहरूले प्रशंसा गर्नेछन् भने मानप्रतिष्ठा र सामाजिक मर्यादामा अभिवृद्धि होला । नसोचेको सम्मान मिल्ने समय छ । कला क्षेत्रमा रुचि बढ्नुका साथै पढाइलेखाइमा सुधार आउने योग छ । कुरा काट्नेहरु प्रशंसक बन्नाले साहस बढ्नेछ । बन्नेछ । समग्रमा अनुकूलता वृद्धि भएको अनुभूति होला ।

धनु – मित्रजनको सहयोगले रोकिएको काम बन्ने समय भएपनि आजको दिन परिवारभित्रै असन्तुष्टि र विवादको अवस्था निम्तिन सक्छ । पतिपत्नीबीच सल्लाह नमिल्ने देखिन्छ । लेनदेनको समस्याले सताउने र ब्यापारमा पनि घाटा ब्यहोर्नुपर्ने योग छ, होसियारी अपनाइ ब्यवहार गर्नुहोला । अनावश्यक रुपमा कसैसँग विवाद र झैझगडा हुनसक्छ, बोली र व्यवहारमा अत्यन्त सजग रहनु उचित हुनेछ ।

मकर – आजको दिन केही चुनौतीयुक्त रहला । आर्थिक समस्याले पनि सताउन सक्छ । लेनदेनमा विवाद बढ्ने तथा घरायसी समस्या पनि आउनसक्ने योग छ । स्वास्थ्यगत समस्याले सताउन सक्छ । चोटपटकको भय समेत रहेकोले विशेष सावधानी अपनाउनु हितकर हुनेछ । शत्रुपक्षबाट हानी हुन सक्छ, ध्यान दिनुहोला । तथापि, कतिपय प्रतिकुलताका बाबजुद मनोरञ्जनात्मक क्रियाकलापमा सहभागितको अवसर जुर्ने देखिन्छ ।

कुम्भ – बोझिला कामबाट मूक्ति र नियमित कार्यबाट पनि फुर्सद मिलेको अनुभूति हुने दिन छ । हितैषी मित्र एवम् आफन्तजनसँगको भेटले मन प्रसन्न रहला । अधुरा काम बन्ने तथा नयाँ काम पाउने योग छ । राम्रै आर्थिक उपार्जनको अवसर मिल्ने देखिन्छ । लामो समयदेखि रोकिएका कामहरू बन्न थाल्नेछन् । कतै आकस्मिक निम्तोमा सहभागी हुने सम्भावना पनि छ । परिवारिक सुख बढ्नाले मन उत्साहित रहला ।

मीन – भविष्यका लागि विशेष काममा जग बसाउने समय छ । विभिन्न अवसरले पछ्याउनेछन् । विपरीतलिंगीबाट विशेष साथ–सहयोग मिल्ने देखिन्छ । प्रेम प्रस्तावको पनि सम्भावना छ । परिवारजनबीच आत्मीयता बढ्नेछ । वित्तादि लाभको योग छ । शैक्षिक प्रगतिका लागि अनुकूल समय आएकोले पठनपाठनमा ध्यान दिनु उत्तम होला । मित्रजनको सहयोग रहनाले जस्तोसुकै समस्याको समाधान मिल्ने देखिन्छ ।