✍ अनन्तश्री राजगुरु जगतगुरु वीरेन्द्र परमहंश ज्योतिषाचार्य

आजको पञ्चाङ्ग

श्रीशाके १९४७ नेपाल सं. ११४६ सिद्धार्थीनाम संवत्सर शरद ऋतु वि.सं. २०८२ कार्तिक २५ गते तद्अनुसार सन् २०२५ नोभेम्बर ११ तारिख मंगलबार मार्गशीर्ष कृष्णपक्षको षष्ठी तिथि ६ः२४ पर सप्तमी तिथि पुष्य नक्षत्र प्रवर्द्ध योग वणि करण आनन्दादिमा शुभ योग चन्द्रमा कर्कट राशिमा राशिमा भ्रमणशील रहनेछ । काठमाडौंमा सूर्योदय बिहान ६ः२३ मा भयो र सूर्यास्त साँझ १७ः१२ बजे हुनेछ । फाल्गुनन्द जयन्ती ।

आजको राशिफल

मेष – आरोग्यबल बढ्ने समय छ । यश–वर्चश्व बढ्नेछ, मानसम्मान पनि पाइएला । महत्वाकांक्षी योजना तत्काल सार्वजनिक नगर्नु हितकर हुनेछ । अनुकुलता वृद्धिका बाबजुद आज आफू केही कमजोर भएको अनुभूति होला । लगनशीलताले परिस्थितिलाई बदल्न सकिने छ । पढाइलेखाइमा चाहेअनुसार समय दिन नसकिएला । नजिकका साथीभाइ टाढिए पनि टाढाका साथीभाइसँग सम्बन्ध जोडिनेछ । आय वृद्धि हुनेछ । शत्रुलाई जित्ने क्षमता वृद्धि हुनेछ ।

वृष – प्रयत्न गर्दा घरेलु काममा फाइदा पुग्ने समय छ । रोकिएका काममा दोहोरÞ्याएर प्रयत्न गर्नुहोला । कर्मबल बढ्नेछ तर कामबाट फुर्सदिलो भइनेछ भने अतिथिका रूपमा सत्कार पाइने योग छ । दाम्पत्य सम्बन्धमा समझदारी बढ्न सक्छ । बोली र व्यवहारले प्रशंसा दिलाउला । मित्रजनसँगको जमघटमा मिठो भोजन प्राप्त हुनेछ । रसरागात्मक कार्यमा आकर्षण बढ्नेछ ।

मिथुन – प्रतिष्ठित काम गरेर धेरैको स्याबासी प्राप्त गर्न सकिनेछ । प्रतिभाको कदर होला । बौद्धिक प्रतिस्पर्धामा पनि अरूलाई उछिन्न सकिने समय छ । दिगो आम्दानी हुने काम सुरु गर्दै हुनुहुन्छ भने अघि बढ्न सक्नुहुनेछ । धेरैलाई लाभ हुने कार्य गर्न सकिनेछ । सामाजिक कार्यले सम्मानित स्थान दिलाउला । मनोरञ्जन एवम् रसरागका क्रियाकलापमा आकर्षण बढ्नेछ ।

कर्कट – दिन केही चुनौतीयुक्त रहला । कम उपलब्धिका लागि पनि निकै मिहिनेत गर्नुपर्ने देखिन्छ । स्वास्थ्यमा कमजोरी एवं काममा अवरोध आउनाले मन खिन्न रहला । नयाँ काममा हात हाल्न केही समय पर्खनु उचित होला । नचिताएको ठाउँमा धननाश हुने योग छ, सजग रहनुहोला । दौडधुप बढ्नेछ र उद्योग–व्यापारमा सामान्य फाइदा मिल्नेछ । बौद्धिक कार्यमा विशेष सफलता मिल्नेछ ।

सिंह – श्रमको उचित मूल्य पाइनुका साथै आम्दानी बढ्ने समय छ । भौतिक साधन जुट्नाले दिगो फाइदा हुने काम प्रारम्भ हुन सक्छ । परदेशमा हुनेलाई घर–परिवारको यादले अलिक सताउने योग छ । शुभचिन्तकहरूको सुझावले फाइदा दिलाउनेछ । नियमित कार्यमा व्यस्तता वृद्धि हुनेछ । इष्र्या गर्नेले दुःख दिन सक्छन्, सजग रहनुहोला । पराक्रम, बौद्धिकता र रचनात्मकता बढ्नाले समस्याको समाधान प्राप्त हुनेछ ।

कन्या – आजको दिन आलश्य गर्ने बानीले केही समस्या निम्त्याउन सक्छ, तर मेहनतीहरूका लागि उत्साहजनक समय छ । रोकिएको काममा सफलता पाउन केही प्रतिस्पर्धा गर्नुपर्ला । विरोधिपक्षको चलखेल बढ्नाले चुनौती सामना गर्नपर्ने देखिन्छ । नयाँ काममा हात हाल्ने समय आएको छ । प्रेम सम्बन्धमा सुधार आउला । दाम्पत्यसुख बढ्नेछ ।

तुला – पुरानो समस्याले केही झमेला आइलाग्न सक्छ, तर व्यापार–व्यवसायमा लाभ हुने समय छ । व्यवसाय विस्तारका लागि यात्राको अवसर जुट्ने देखिन्छ । विद्याका साथै मान प्राप्त होला । विशेष उपहार प्राप्त हुनुका साथै धनलाभको योग छ । खर्च पनि केही बढ्ला । आरोग्यबल बढ्नेछ । यात्रागत कार्यमा सफलता प्राप्त हुनेछ ।

वृश्चिक – आजको दिन अनुकूलता वृद्धि भएको अनुभूति हुनेछ । बोली र व्यक्तित्वको प्रभावले धेरैको मन जित्न सकिएला । लगनशीलताले राम्रै उपलब्धि दिलाउने छ भने चिताएका काम क्रमशः सम्पादन हुनेछन् । आर्थिक उपार्जन हुने योजनामा लगानी बढाउने मौका जुर्न सक्छ, तथापि अवसरलाई पछ्याउन नसक्दा हातमा आएको मौका गुम्न सक्छ, सजग रहनुहोला । पारिवारिक असमझदारी बढ्न नदिन विशेष प्रयासको दरकार छ । मित्रजन सहयोगी बन्नेछन् ।

धनु – व्यक्तिगत एवम् पारिवारिक समस्याको समाधान मिल्ने र यात्रापरक काम बन्ने समय छ । पढाइलेखाइमा सामान्य प्रगति होला । सहयोगीका माध्यमबाट विशेष काम बन्ने र सेवामूलक कामबाट धनलाभ हुने योग छ । सन्तानपक्षबाट सुख प्राप्ति हुनेछ । फलदायी यात्राको अवसर जुर्ला । व्यापार-व्यवसायबाट खासै लाभ नमिल्न सक्छ । नयाँ योजना कार्यान्वयनमा ल्याउन समस्या पर्ला । बौद्धिक र रचनात्मक कार्यमा आंशिक सफलता मिल्नेछ ।

मकर – आजको दिन केही अवसर जुटे पनि परिस्थिति अलिक संघर्षमय रहला । अप्ठ्यारा कामको बोझ थपिन सक्ने र हठ गर्ने बानीले समस्या निम्त्याउने योग छ । विशेष योजना अघि बढाउँदै हुनुहुन्छ भने अरूको सुझावमा भर नपर्नु उचित हुनेछ । विवादबाट बच्न बोली र व्यवहारमा नियन्त्रण गर्नु हितकर होला । लेखाइपढाइमा प्रगति हुनेछ । नियमित खर्चमा केही बढोत्तरी हुने देखिन्छ ।

कुम्भ – सरल जीवनशैलीले धेरैको मन लोभ्याउन सकिने दिन छ । भौतिक साधन जुट्नेछ भने आम्दानी बढाउने काम सुरु गर्न सकिनेछ । आयआर्जन राम्रै होला । विभिन्न अवसर प्राप्त भए पनि अरूको मुख ताक्ने बानीले काममा धोका हुन सक्छ, ध्यान राख्नुहोला । सबल स्वास्थ्यका लागि खानपान लगायतका व्यवहारमा सजगता अपनाउनुपर्नेछ । शत्रुपक्ष परास्त हुनेछ ।

मीन – मिश्रित फलदायी समय छ । सहयोगीहरूले फाइदा दिलाउनेछन् भने मेहनतले प्रतिस्पर्धाको दौड जिताउन सक्छ । तर, नियमित कार्यमा अरूको भर पर्दा धोका हुनेछ । परिस्थितिअनुसार चल्न नसक्दा दुःख पाइने देखिन्छ । पहिलेको उपलब्धिले उत्साह जगाउला, तर खर्चको भार वृद्धि हुने योग छ । कुनै कामको लागि यात्रा गर्दै हुनुहुन्छ भने आजका लागि थाती राख्नु उचित होला । आरोग्यबल बढ्नेछ ।