गीतकार श्रीराम राईको तेस्रो गीत ‘छैन क्यारे मेरो लागि दुख्ने मुटु पनि’ सार्वजनिक भएको छ । उक्त गीतको अडियो ओसियन म्यूजिक नेपालको युट्युब च्यानलबाट सार्वजनिक गरिएको हो ।

गीतकार राईको शब्दलाई संगीतकार ओमप्रकाश राईको संगीत र पेमा शेर्पा राईको स्वरले प्राण भरेको छ ।

गायिका पेमाले दर्जनौँ गीत गाएकी छन् भने संगीतकार ओमप्रकाश राईले सयौं गीतमा संगीत भरेका छन् ।

सार्वजनिक गीतको एरेञ्ज सन्तोष प्रगाढ राईले, इडिट वीरेन्द्र भाट विपिन र मिक्सिङ गोविन्द सोनीले गरेका छन् । गीतले एकतर्फी प्रेमको पीडा र चोखो प्रेमको आत्मीयता प्रस्तुत गरेको छ ।

यसअघि गीतकार राईका दुई गीत रेकर्ड भएका छन् । २०७५ सालमा शिला खनालले उनको ‘मधुमासमै मिठो साथ छुटेपछि रोएँ’ गीत गाएकी थिइन् ।

त्यस्तै २०७९ सालमा मनमा बी राईले उनको ‘सञ्चो छौ बिसञ्चो’ गीत गाएकी थिइन् । उनको ‘सञ्चो छौ बिसञ्चो’ गीतलाई २०८१ सालमा नवराज पराजुलीले पनि गाएका थिए ।

दिक्तेल रुपाकोट मझुवागढी नगरपालिका–७, सिर्जनाकुञ्ज, दोर्पा, खोटाङका गीतकार राई साहित्य लेखन र पत्रकारितामा उत्तिकै सक्रिय छन् । उनले साहित्यका विविध विधामा कलम चलाउँदै आएका छन् । उनका दुई बालकथासंग्रह ‘पोलेको मकै’ (२०७८) र ‘टोली नेता’ (२०७४) प्रकाशित छन् ।

‘लघुकथा सौन्दर्य’मार्फत लघुकथाको विधागत उन्नयनमा लागेका गीतकार राईका ‘आजका लघुकथा’ (२०७४) र ‘संयोग’ सामुहिक लघुकथासंग्रह पनि प्रकाशित छन् । उनको संयोजन तथा विमल भौकाजीको सम्पादनमा हालै ‘बलेँसी’ सामुहिक लघुकथासंग्रह पनि प्रकाशित छ ।

रावासावा प्राज्ञिक समाज नेपालका सचिव राई लघुकथा समाज नेपालको पहिलो शाखा खोटाङका अध्यक्ष पनि हुन् ।