बहुचर्चित ३३ किलोग्राम सुन काण्डमा संलग्न भनिएका सनम शाक्यको हत्याआरोपी एक जनालाई नेपाल प्रहरीले पक्राउ गरेको छ ।

जिल्ला प्रहरी परिसर काठमाडौंको टोलीले सो अभियोगमा मकवानपुरको हेटौँडा उपमहानगरपालिका-१७ का ३३ वर्षीय सुरेन्द्र गौतमलाई पक्राउ गरी बिहीबार (१ माघ) सार्वजनिक गरेको हो ।

मोरङ उर्लाबारीका सनम शाक्यलाई विसं २०७४ फागुन १८ गते कुटपिट तथा करेन्ट लगाएर हत्या गरिएको थियो । सुन कारोबारमा संलग्न मुख्य अभियुक्त चुरामणि उप्रेती (गोरे)लाई प्रहरीले यसअघि नै पक्राउ गरिसकेको छ ।

पक्राउ परेका गौतमलाई आवश्यक अनुसन्धानका लागि बिहीबार नै जिल्ला प्रहरी कार्यालय मोरङ पठाइएको जिल्ला प्रहरी परिसर काठमाडौंका प्रवक्ता, प्रहरी उपरीक्षक पवनकुमार भट्टराईले जानकारी दिएका छन् ।