हामीले धेरै पटक भावनामा बगेर भोट हाल्यौँ होला । कहिलेकाहीँ लहडमा लागेर निर्णय गऱ्यौँ होला । तर यसपटक हामीसँग गल्ती गर्ने छुट छैन । यो चुनाव केवल एउटा सांसद छान्ने प्रक्रिया मात्र होइन, यो त स्वाभिमान जोगाउने र इतिहासका निर्माताप्रति सम्मान व्यक्त गर्ने अवसर हो ।

✍ सन्तोष अधिकारी 

समयको चक्र कहिलेकाहीँ यस्तो बिन्दुमा आएर उभिन्छ, जहाँ हामीले लिएका साना निर्णयहरूले इतिहासको ऋण तिर्ने र भविष्यको मार्ग कोर्ने सामर्थ्य राख्छन् । आज म आफ्नो घरदेशभन्दा हजारौँ माइल टाढा, अमेरिकाको ब्यस्त जीवनमा ब्यस्त रहँदा पनि मेरो मन भने तनहुँका ती खेतका गह्रा, उखुबारी, छाब्दीबाराही, बन्दीपुर, मानुङ डाँडा र सेती-मादीको तिरमै डुलिरहेको छ । टाढा भएर के भयो र ? मुटुको एउटा कुना सधैँ त्यही तनहुँको माटोका लागि धड्किरहन्छ।

अहिले देशमा चुनावको रन्को छ। उखु काट्ने बेला भएको छ, किसानको पसिना खेतमा बगिरहेको छ । तर विडम्बना, यही बेला म यो गर्छु, म त्यो गर्छु भन्दै खोक्रा भाषण दिनेहरूको भिड पनि गाउँ पसेको छ । सबैलाई देश बनाउने हुटहुटी छ भन्छन् । तर जब कसरी बनाउने भनेर ठोस प्रश्न गरिन्छ, उत्तर आउँदैन । केवल सस्तो लोकप्रियता, विवाद र अराजकतामा रमाउनेहरूको जमात देखिन्छ । योजना र नीतिको साटो केवल नारा बेचेर देश बन्दैन, त्यसले त केवल अस्थिरता मात्रै निम्त्याउँछ ।

यस्तो अन्योलको बीचमा आज मलाई मेरो जिल्ला तनहुँको त्यो ऐतिहासिक विरासतको याद आइरहेको छ, जसलाई गोविन्दराज जोशीले आफ्नो जीवनको ऊर्जा दिएर सिञ्चित गर्नुभयो ।

तनहुँको विकास र चेतनाको कुरा गर्दा एउटा नाम अपरिहार्य छ त्यो हो गोविन्दराज जोशी । उहाँको योगदान कुनै सरकारी ढड्डाका तथ्याङ्कमा मात्र सीमित छैन । उहाँको योगदान त ती हजारौँ अनुहारको मुस्कानमा छ, जसले सङ्कटको बेला उहाँलाई आफ्नो अभिभावकको रूपमा पाए । व्यक्तिगत रूपमा भन्नुपर्दा, आज म यो स्थानसम्म आइपुग्नुमा, मभित्र आत्मविश्वासको बीउ रोप्नमा र अवसरका ढोकाहरू खोल्नमा उहाँको मार्गदर्शन र सहयोगको जुन ठुलो ऋण छ, त्यो म कहिल्यै बिर्सन सक्दिनँ ।

तनहुँ जिल्लाको विकास, सामाजिक चेतना र नागरिकको जीवनस्तर उकास्न गोविन्दराज जोशीले दिनुभएको योगदान कुनै पद, हैसियत वा तथ्यांकमा सीमित छैन । उहाँको योगदान त ती हजारौँ जीवनमा देखिन्छ, जहाँ उहाँले संकटको बेला साथ दिनुभयो, अवसरको ढोका खोलिदिनुभयो र राजनीतिप्रति विश्वास जगाइदिनुभयो । व्यक्तिगत सहयोगदेखि सामाजिक र राजनीतिक योगदानसम्म, गोविन्दराज जोशी तनहुँवासीका लागि सधैं भरोसाको नाम रहनुभएको छ ।

म त केवल एक प्रतिनिधि पात्र मात्र हुँ । म जस्तै कैयौँ तनहुँवासी छन्, जसलाई उहाँले संकटमा काँध दिनुभयो, पढ्न मद्दत गर्नुभयो र राजनीतिलाई सेवाको माध्यम बनाउन सिकाउनुभयो । शिक्षा, स्वास्थ्य र पूर्वाधारमा उहाँले बसाल्नुभएको जगकै कारण आज तनहुँले गौरव गर्न पाएको हो । उहाँले कसैलाई राजनीति सिकाउनुभयो, कसैलाई जीवन जिउने आधार दिनुभयो । आज त्यही गुण तिर्ने बेला आएको छ ।

आज उहाँका छोरा दीपकराज जोशी हाम्रो बीचमा उम्मेदवार हुनुहुन्छ । दीपकराज जोशी केवल गोविन्दराज जोशीका छोरा हुन् भन्नु उहाँको व्यक्तित्वको अवमूल्यन गर्नु हो । उहाँ एक इमानदार, विद्वान् र सरल जीवनशैली भएका व्यक्ति हुनुहुन्छ । हामीले बिर्सिएका छैनौँ, स्थानीय तहको निर्वाचनमा उहाँमाथि कति ठुलो अन्याय भयो । उहाँमाथि भौतिक आक्रमण भयो, मतगणनामा धाँधलीका गम्भीर प्रश्नहरू उठे । उच्च अदालतले पुनः मतगणनाको आदेशसमेत दियो, जुन मुद्दा अहिले सर्वोच्चमा विचाराधीन छ । यति धेरै अन्याय र प्रहार हुँदा पनि दीपकराज जोशीले कहिल्यै सडकमा अराजकता फैलाउनुभएन । उहाँले कहिल्यै सस्तो लोकप्रियताका लागि गालीगलौजको राजनीति गर्नुभएन । उहाँले विधि, पद्धति र न्यायपालिकामाथि विश्वास देखाउनुभयो । आजको हल्लाखोर राजनीतिमा यस्तो सालिनता र संस्कार पाउनु भनेको तनहुँका लागि गर्वको कुरा हो ।

दीपकराज जोशीलाई विजयी बनाउनु भनेको इमानदारीलाई विजयी बनाउनु हो । उहाँलाई मत दिनु भनेको गोविन्दराज जोशीले तनहुँका लागि बगाएको पसिनाको कदर गर्नु हो । अनि उहाँलाई चुन्नु भनेको तनहुँको भविष्यलाई एउटा सुरक्षित, शिक्षित र दूरदर्शी नेतृत्वको हातमा सुम्पनु हो ।

अहिलेको राजनीतिमा दुई धार छन् । एउटा धार छ, जसले केवल नारा बेच्छ, अराजकता फैलाउँछ र भावनामा टेकेर सत्तामा पुग्न चाहन्छ । अर्को धार छ, जसले नीति, योजना र संस्कारमा विश्वास गर्छ । दीपकराज जोशी दोस्रो धारको प्रतिनिधित्व गर्नुहुन्छ । 

दीपकराज जोशीसँग शिक्षा र सूचना प्रविधि (IT) क्षेत्रको जुन गहिरो ज्ञान छ, त्यो आजको तनहुँका लागि एक वरदान सावित हुन सक्छ । हामीलाई थाहा छ, अबको विकास केवल बाटो खनेर वा ढुङ्गा माटोले मात्र पुग्दैन । अबको विकासलाई प्रविधिसँग जोड्नुपर्छ । दीपकराज जोशीसँग भएको त्यो आधुनिक भिजनले तनहुँका युवाहरूलाई स्थानीय स्तरमै प्रविधिमा आधारित रोजगारीका अवसरहरू सिर्जना गर्न सक्छ ।

शिक्षा क्षेत्रमा डिजिटल क्रान्ति ल्याएर हाम्रा सरकारी विद्यालयहरूको गुणस्तर सुधार्न सक्छ । सरकारी सेवालाई प्रविधिमैत्री बनाएर पारदर्शी तनहुँ निर्माण गर्न सक्छ । उहाँको यही ज्ञानले नै तनहुँलाई राष्ट्रिय र अन्तर्राष्ट्रिय स्तरमा एकपटक फेरि गौरवशाली जिल्लाको रूपमा चिनाएर तनहुँलाई विकासको नयाँ उचाइमा पुर्‍याउने दृढता छ ।

हामीले धेरै पटक भावनामा बगेर भोट हाल्यौँ होला । कहिलेकाहीँ लहडमा लागेर निर्णय गऱ्यौँ होला । तर यसपटक हामीसँग गल्ती गर्ने छुट छैन । यो चुनाव केवल एउटा सांसद छान्ने प्रक्रिया मात्र होइन, यो त तनहुँको स्वाभिमान जोगाउने र इतिहासका निर्माताप्रति सम्मान व्यक्त गर्ने अवसर हो ।

म आज यो लेख कुनै राजनीतिक लाभका लागि लेखिरहेको छैन । म यो लेख मेरो माटोप्रतिको जिम्मेवारी र गोविन्दराज जोशीले लगाएको गुणप्रतिको इमानदारीका लागि लेखिरहेको छु । मेरो सम्पूर्ण तनहुँवासी दाजुभाइ तथा दिदीबहिनीहरूलाई मेरो एउटै विनम्र अनुरोध छ । यसपटक दीपकराज जोशीलाई मतदान गरौँ । उहाँलाई विजयी बनाउनु भनेको इमानदारीलाई विजयी बनाउनु हो । उहाँलाई मत दिनु भनेको गोविन्दराज जोशीले तनहुँका लागि बगाएको पसिनाको कदर गर्नु हो । अनि उहाँलाई चुन्नु भनेको तनहुँको भविष्यलाई एउटा सुरक्षित, शिक्षित र दूरदर्शी नेतृत्वको हातमा सुम्पनु हो ।

अस्थिरता र सस्तो लोकप्रियताको भड्खारोबाट देशलाई जोगाउन अब तनहुँले विवेकपूर्ण निर्णय लिनैपर्छ। इतिहासको सम्मान गरौँ, भविष्यको मार्ग प्रशस्त गरौँ । दीपकराज जोशीको विजय नै तनहुँको समृद्धिको वास्तविक सुरुवाती बिन्दु हुनेछ । याद राखौँ, भावनाले भिड त जम्मा होला, तर नीति र निष्ठाले मात्र देश बन्छ ।

यसपालि गोविन्दराज जोशीले तनहुँका लागि लगाएको गुण तिर्ने ऐतिहासिक निर्णय गरौँ । यो चुनाव केवल उम्मेदवार छान्ने प्रक्रिया होइन ।

यो आक्रोश कि विवेक, हल्ला कि दृष्टि, क्षणिक लोकप्रियता कि दीर्घकालीन स्थायित्व छान्ने अवसर हो । दीपकराज जोशीलाई मत दिनु भनेको इमानदारीलाई मत दिनु हो, राजनीतिक संस्कारलाई मत दिनु हो, र तनहुँको भविष्यलाई सुरक्षित हातमा सुम्पनु हो । अब तनहुँले भावनामा होइन, विवेकमा आधारित निर्णय गर्नुपर्छ ।