महोत्तरी जिल्लाको औरही नगरपालिका-१ मा अज्ञात व्यक्तिले मंगलबार (२० माघ) दिउँसो १० जना किसानको करिब सात बिघा उखुखेतीमा आगजनी गरेको छ ।

जिल्ला प्रहरी कार्यालय महोत्तरीका प्रवक्ता एवं प्रहरी नायब उपरीक्षक शैलेन्द्रकुमार भट्टका अनुसार स्थानीय हरिनारायण यादव, रामवृक्ष राय, रासदेवी यादव, नगिनादेवी यादवलगायत १० जना किसानहरूले ५ बिघा सात कट्ठा क्षेत्रफलमा लगाएको उखु बालीमा अज्ञात व्यक्तिले आगजनी गरी नष्ट बनाएको हो ।

जिल्लाको गौशाला नगरपालिका-१ स्थित एभरेष्ट सुगर एण्ड केमिकल इण्डष्ट्रिजका जेटिए अमिरी महतोका अनुसार किसानहरूले ६ बिघा सात कट्ठा क्षेत्रफलमा लगाएको उखु बाली आगजनीले नष्ट हुँदा किसानहरूको करिब रु १४ लाख मूल्य बराबरको क्षति भएको छ ।

आगलगीमा परेका उखुबाली २४ घण्टाभित्र क्रसिङ (चिनी बनाउने काम) गरिएमा दुई प्रतिशत मात्रै कट्टा हुन्छ । तर, त्यसभन्दा ढिलो भएमा जलेको उखु ल्याबमा पठाउनुपर्छ र ल्याबकै रिपोर्ट अनुसार गणना हुन्छ । किसानले काट्नका लागि ठिक्क पारेको उखुमा अचानक आगजनी भएपछि किसानहरू आर्थिक मारमा परेका छन् ।

उखुखेतीमा गरिएको आगजनीलाई जिल्लाको रामगोपालपुर नगरपालिका, जलेश्वर नगरपालिका, बर्दिबास नगरपालिका र सम्सी गाउँपालिकाबाट आएका बारुण यन्त्रहरूको सहयोगमा नियन्त्रणमा लिइएको थियो ।

_{^{Representative image}}