तीन महिनाको झापा बसाइपछि राजधानी काठमाडौं फर्किनुभएका राजा ज्ञानेन्द्रको त्रिभुवन विमानस्थलमा समर्थकहरुद्वारा भव्य स्वागत गरिएको छ । कैलाश एयरको हेलिकप्टरमा दमकबाट काठमाडौं आउनुभएका राजालाई राजसंस्थाका पक्षधर तथा राजाका समर्थकहरुले फूल र राष्ट्रिय झण्डाका साथ उत्साहपूर्वक स्वागत गरेका हुन् ।

राजाको स्वागतमा विमानस्थल पुगेका समर्थकहरुले ‘राजा आऊ देश बचाऊ’ ‘नारायणहिटी खालि गर’, ‘गणतन्त्र मुर्दावाद’ लगायतका नारा लगाएका थिए भने सनरूफ कारमा उभिएर राजा ज्ञानेन्द्रले हात हल्लाउँदै समर्थकहरूलाई धन्यवाद दिनुभएको थियो । उहाँलाई समर्थकहरुले र्‍यालीका साथ निर्मल निवास लैजाँदैछन् ।

ज्ञातव्य छ, राजाको आगमन र समर्थकहरुको उपस्थितिको पूर्वआँकलन गरेर काठमाडौं जिल्ला प्रशासन कार्यालयले आज (१ फागुन) त्रिभुवन अन्तरराष्ट्रिय विमानस्थल क्षेत्रमा जुलुस, प्रदर्शन, हड्ताल तथा भेलाजस्ता कार्यक्रम गर्न नपाइने भनी सूचना जारी गरेको थियो ।