• _{^{विशेष प्रतिनिधि, जापान}}

जापानकी प्रधानमन्त्री सानाए ताकाइचीको मन्त्रिपरिषद्ले बुधबार (१८ फरवरी) बिहान सामूहिक राजीनामा दिएको छ।

गत अक्टोबरमा जापानको पहिलो महिला प्रधानमन्त्री बनेकी ताकाइचीले नयाँ संसद् बैठक सुरु हुनुअघि यो कदम चालेकी हुन् ।

फेब्रुअरी ८ मा भएको प्रतिनिधिसभा निर्वाचनमा उनको सत्तारुढ लिबरल डेमोक्रेटिक पार्टी (एलडीपी)ले ४६५ सिटमध्ये दुई तिहाइभन्दा बढी स्थानमा जित हासिल गरेको थियो ।

यसपटक एलडीपीले पुरानो साझेदार कोमेइतोसँगको सहकार्य अन्त्य गर्दै ‘जापान इनोभेसन पार्टी’सँग नयाँ गठबन्धन बनाएको छ ।

बुधबार नै बस्ने संसद्को विशेष अधिवेशनले ताकाइचीलाई पुनः प्रधानमन्त्रीमा निर्वाचित गर्ने निश्चित देखिएको छ । दुवै सदनको निर्वाचनपछि उनले नयाँ मन्त्रिपरिषद् गठन गर्नेछिन् । विशेष अधिवेशन जुलाइ १७ सम्म, १५० दिनसम्म चल्ने तय गरिएको छ ।