राष्ट्रिय स्वतन्त्र पार्टी (रास्वपा) ललितपुरकी महालक्ष्मी नगर कमिटी उपाध्यक्ष पुजा बस्नेत विश्वकर्माले भक्तपुर क्षेत्र नम्बर २ नेपाली काङ्ग्रेसका उम्मेदवार कविर राणालाई जिताउने उद्घोष गरेकी छिन् ।

सोमबार (११ फागुन) बालकोटमा आयोजना गरिएको चुनावी सभामा पुगेकी विश्वकर्माले रास्वपाभित्र अवसरवादीहरु हाबी भएको भन्दै राणालाई विजयी गराउन आब्हान पनि गरिन् ।

‘म राष्ट्रिय स्वतन्त्र पार्टीको सदस्यता लिएको व्यक्ति हुँ । कांग्रेसको घरदैलोमा किन आइरहेको छु भने मेरो पार्टीभित्रको गलत प्रवृति भन्न पनि आएको हुँ । रास्वपाको स्थापनाकालदेखिको सदस्य हुँ तर कांग्रेससँग मेरो परिवारको साइनो भएकाले कविर दाइलाई जिताउनुपर्छ भनेर आएको छु’, उनले अगाडि भनिन्,’नयाँलाई विश्वास गर्नुपर्छ भनेर लाग्यौँ तर नयाँ भित्र धेरै खराब र अवसरवादी व्यक्तिहरु देखिएका छन् । हामी अवसरवादीहरुलाई भोट दिएर जिताउन चाँहदैनौं ।’

उनले रास्वपा विनाश हुनबाट रोक्नका लागि कांग्रेसको मन्चमा आएर उभिएको बताइन् । ‘कविर दाइलाई भोट मागिरहँदा कुनै स्वार्थ छैन् । यहाँ टुरिष्ट उम्मेदवारहरुपनि आउनु भएको छ । उहाँहरु भन्दा कविर दाइ उपयुक्त पात्र हुनुहुन्छ,’ उनले भनिन् ।

चुनावी सभाको मञ्चबाट उनले यस्तो अभिव्यक्ति दिएकी थिइन्-

आज म तपाईंहरूमाझ एउटा विशेष परिस्थिति र प्रष्ट सोचका साथ उभिएको छु । म रास्वपाको स्थापना कालदेखिको सदस्य हुँ, यो सत्यलाई म सहर्ष स्वीकार गर्छु । तर, कुनै पार्टीको सदस्य हुनुको अर्थ आफ्नै पार्टीभित्रका कमजोरी वा गलत कुरालाई आँखा चिम्लेर समर्थन गर्नु पक्कै होइन । आज हाम्रो राजनीति बिग्रिनुको मुख्य कारण नै ‘आफ्नो पार्टीको मान्छे जस्तोसुकै भए पनि राम्रो’ भन्ने प्रवृत्ति हो ।

हामीले नेपाली कांग्रेसलाई दशकौँदेखि चिन्दै आएका छौँ । मेरो परिवार, मेरा बुबा, हजुरबुबा र मेरो श्रीमान् स्वयं नेपाली कांग्रेसको विचारलाई माया गर्ने व्यक्तित्व हुनुहुन्छ । पछिल्लो समय नयाँ पुस्ताको हिसाबले ‘नयाँ शक्तिलाई विश्वास गर्नुपर्छ’ भनेर म रास्वपामा लागेकी हुँ । तर, नयाँ भित्र पनि मैले धेरै खराब र अवसरवादी पात्रहरू देखेँ । जो केवल अवसरको खोजीमा एक ठाउँबाट अर्को ठाउँ पुग्छन्, उनीहरूले विकास होइन, विनाश निम्त्याउँछन् ।

त्यसैले, भक्तपुरको भविष्यलाई विनाश हुनबाट जोगाउन म आज कांग्रेसको घरदैलोमा तपाईंहरूसामु उभिएकी छु। भक्तपुर क्षेत्र नं. २ बाट नेपाली कांग्रेसका उम्मेदवार कबिर राणा दाई हुनुहुन्छ। उहाँ यो माटोलाई नजिकबाट चिन्ने, यहीँको संस्कार र संस्कृतिमा हुर्किएको व्यक्ति हुनुहुन्छ।

मैले यो भनिरहँदा कसैले ‘स्वार्थ होलाू भन्लान्, तर मेरो कुनै व्यक्तिगत स्वार्थ छैन । मेरो चिन्ता केवल भक्तपुरको विकासको हो। हाम्रै पार्टी (रास्वपा) बाट राजीव खत्रीजी उम्मेदवार हुनुहुन्छ । उहाँ पत्रकार त हुनुहोला, तर अर्कै जिल्लाबाट आएर भक्तपुरको भूगोल र यहाँको रीतिरिवाज नबुझी उम्मेदवारी दिनु मलाई उचित लागेन । जसले भक्तपुरलाई बुझेकै छैन, उसले यहाँको प्रतिनिधित्व कसरी गर्न सक्छ ?

यदि हामीले केवल ‘घण्टी’ हेरेर भोट दियौँ भने, निर्वाचित उम्मेदवारलाई भक्तपुर बुझ्न नै पाँच वर्ष लाग्नेछ । के हामी भक्तपुरलाई पाँच वर्ष पछाडि धकेल्न चाहन्छौँ कि अगाडि बढाउनरु यो मेरो आफ्नै पार्टीको विरोध होइन, बरु मतदातालाई सजग बनाउने प्रयास हो ।

कतिपयले ‘घण्टी भनेकै बालेन हो” भन्ने भ्रममा भोट हाल्ने कुरा गर्नुहुन्छ । तर वास्तविकता त्यस्तो होइन। उम्मेदवार को हो र उसको योगदान के हो भन्ने नहेरी मतदान गर्नु घातक हुन्छ । नेपाली कांग्रेसमा कबिर राणा जस्ता योग्य व्यक्तिहरू हुनुहुन्छ । उहाँ १६ वर्षको उमेरमा पार्टी र परिवर्तनका लागि जेल पर्नुभएको इतिहास छ । उहाँले आफ्नो जीवन यही माटो र यहीँका मान्छेका लागि खर्चिनुभएको छ।

आज म जस्ता युवाहरू बोल्न बाध्य हुनुको कारण हामीलाई अवसरवादी होइन, कर्मठ मान्छे चाहिएको हुनाले हो। जो व्यक्ति आफ्नै गृह जिल्लाका समस्या समाधान गर्न छोडेर यहाँ आएका छन्, उनीहरूबाट हामीले के आशा गर्ने ?

अन्त्यमा, म फेरि पनि दोहोर्‍याउँछु म रास्वपाकै सदस्य हुँ र पार्टीलाई माया गर्छु । तर यो चुनावमा पार्टीभन्दा माथि उठेर भक्तपुरका लागि ‘राम्रो मान्छे’ छान्नुपर्ने बेला आएको छ। कबिर राणा दाईलाई जिताउनु भनेको हाम्रो भविष्य सुरक्षित गर्नु हो। यदि यो सत्य बोल्दा मेरो पार्टीले मलाई कारबाही गर्छ भने पनि म त्यो भोग्न तयार छु।

भक्तपुरको माटो, यहाँको समस्या र भावना बुझ्ने व्यक्तित्व कबिर राणा दाईलाई यस पटक अमूल्य मतदान गरी विजयी गराउनुहुन म सम्पूर्णमा हार्दिक अपिल गर्दछु ।