• _{^{सन्जिव दुलाल, भक्तपुर}}

नेपाल बार एशोसिएशनको आयोजनामा कानुन व्यवसायी महिलाहरूको ३२औँ राष्ट्रिय सम्मेलन भक्तपुरमा आयोजना हुने भएको छ । ‘महिलाको समानुपातिक समावेशिता : परिवर्तित र न्यायपूर्ण समाजको सुनिश्चितता’ भन्ने मूल नारासहित सञ्चालन हुने सम्मेलन चैत ६ र ७ गते स‌ञ्चालन हुने आयोजकले जनाएको छ।

भक्तपुर जिल्ला अदालत बारको आतिथ्ययतामा हुने उक्त सम्मेलनमा उक्त सम्मेलनमा देश भरका महिला कानुन व्यवसायीहरूको सहभागिता हुने नेपाल बार एशोसिएशन भक्तपुरका अध्यक्ष राम सुन्दर खाइतुले जानकारी दिए । उनका अनुसार सम्मेलनमा बारमाआवद्ध सम्पूर्ण कानुन व्यवसायीहरू — वरिष्ठ अधिवक्ता, अधिवक्ता, अभिवक्ता, साथै नेपाल बार एशोसिएशनका पूर्व पदाधिकारी तथा सदस्यहरूलाई सक्रिय सहभागिताका लागि उनले आग्रह गरेका छन् ।

सम्मेलनको सम्पूर्ण तयारी पुरा भएको बारका सचिव अनीश सुवालले बताए । उनका अनुसार आगामी चैत ६ र ७ गते हुने उक्त कार्यक्रमको तयारी पुरा भएको छ । ६ गते बिहान भक्तपुरको दत्तात्रय मन्दिरबाट प्रभातफेरी निकालेर कार्यक्रमको सुरु गरिनेछ । प्रभातफेरी दत्तात्रय हुँदै ख्वप बैंक्वैट नगरकोट रोडमा पुगेर उद्घाटन हुने र दोस्रो दिन भक्तपुर जिल्ला अदालतको सभा कक्षमा विभिन्न विषयहरूमा विषय विज्ञका साथमा छलफल हुनेछ । सम्मेलनले महिला कानुन व्यवसायीहरूको भूमिका, समानुपातिक समावेशिता तथा न्यायपूर्ण समाज निर्माणमा उनीहरूको योगदानबारे महत्त्वपूर्ण छलफल गर्ने विश्वास लिइएको छ।

आयोजकले सम्मेलनमा सहभागी हुने सबैलाई अनिवार्य रूपमा कालो कोटसहित मर्यादित पहिरनमा उपस्थित हुन आग्रह गरेको छ।