नेपाली काङ्ग्रेसको तेह्रौँ महाधिवेशनमा वरिष्ठ राजनीतिज्ञ शेरबहादुर देउवा पार्टी सभापतिमा अत्यधिक मतले विजयी हुनु भएपछि नेपालको प्रजातान्त्रिक इतिहासमै नयाँ युगको उदय भएको छ । नेपाली काङ्ग्रेस पार्टीका संस्थापक एवम् सन्त नेता स्व. कृष्णप्रसाद भट्टराईका उत्तराधिकारीका रूपमा परिचित श्री देउवाको यस विजयले काङ्ग्रेसलाई परिवारवादबाट जनतामा ल्याउन सफल भएको मैले महसूस गरेको छु । साथै विगत असोज अन्तिमदेखि नेपाली जनता आपराधिक व्यक्तिको सत्ताबाट आहत भइरहेको व्यहोरा जगजाहेर नै छ । विशेष गरी गुण्डा, माफिया, तस्करका नाइकेबाट राज्यसत्ता सञ्चालन भएकाले मुलुकमा अराजकता छाइरहेको सवैमा विदितै छ । यस्तो पेचिलो देशका दूरावस्थामा श्री देउवाको उदयले सबैलाई मिलाएर राष्ट्रिय सरकारको गठनमा विशेष पहल हुने मैले विश्वास लिएको छु । बीपी कोइराला, कृष्णप्रसाद भट्टराईपछि काङ्ग्रेस पथभ्रष्ट हुँदै कम्युनिष्टहरूको संरक्षक बनेजस्तो भइरहेको थियो । विशेष गरी गणेशमान सिंह र किशुनजी जस्ता त्यागी नेताहरूलाई पार्टीबाट बाहिर पारिएको थियो ।
आज देउवाको विजयले के सिद्ध गरेको छ भने त्यस्तो निकृष्ट कार्य कोही व्यक्ति विशेषले मात्र गरेको हो र आम काङ्ग्रेसी कार्यकर्ताले होइन भन्ने ठहर भएको छ । यतिबेला किशुनजी हुनुभएको भए उहाा कति खुशी हुनुहुन्थ्यो होला ? म भन्न सक्तिना । जे भए पनि किशुनजीका प्रियपात्र श्री देउवाजीलाई जिताएर काङ्ग्रेसी कार्यकर्ताले किशुनजीको स्वर्गीय आत्माको सम्मान गरेकोमा म सबै नेपाली काङ्ग्रेस पार्टी र सम्पूर्ण सदस्यहरूलाई हार्दिक धन्यवाद दिन चाहन्छु । अन्तमा श्री देउवाबाट काङ्ग्रेसको प्रजातान्त्रिक समाजवादको कार्यान्वयन भएमा आदरणी जननेता विश्वेश्वरप्रसाद कोइरालाको समेत सम्मान हुने थियो । यस महान् कार्यका लागि देउवालाई सफलता मिलोस् भन्ने कामना सहित हार्दिक बधाई ज्ञापन गर्दछु ।
– महाकवि देवकोटाको अनुयायी
अभागी कवि रत्ननिधि रेग्मी, ‘शुक्राचार्य’
प्रतिक्रिया