नेपाल भ्रमणमा रहेका ह्यारी नामले प्रसिद्ध बेलायती राजकुमार हेनरी चाल्र्स अल्बर्ट डेभिडले मंगलबार पोखराको लामाचौरस्थित गोर्खा ब्रिटिस क्याम्प पुगेर अफगानिस्तानमा मारिएका बेलायती गोर्खाली सेनाप्रति भावपूर्ण श्रद्धाञ्जलि अर्पण गरेका छन् । अफगानिस्तानमा युवराज राई, कृष्णप्रसाद दुरा, कुमार पुन, अर्जुन पुन, रेमन्द खुलुङ, ईश्वर गुरुङ, सुरज गुरुङ, सुरज लिम्बू, सचिन लिम्बू, गजेन्द्र गुरुङ र सिद्धार्थ गुरुङ गरी एघार गोर्खा सैनिकले वीरगति प्राप्त गरेका थिए । बेलायती सैनिक पोसाकमा राजकुमार ह्यारीले सो समारोहमा भाग लिनुभएको थियो । वीरगति प्राप्त गर्ने गोर्खा सैनिकको आत्माको चिर शान्तिको कामना गर्दै हिन्दू र बौद्ध परम्पराअनुसार शान्ति पाठ गरिएको थियो । सोही अवसरमा ह्यारीले अफगानिस्तान युद्धमा मारिएका गोर्खा सैनिकका आफन्तजन र परिवारजनसाग भलाकुसारी गर्दै समवेदना व्यक्त गरे भने वीरगति प्राप्त गर्नेहरूको सम्झनामा उनले दुई मिनेट मौनधारण समेत गरेका थिए । सो कार्यक्रममा नेपालका लागि बेलयाती राजदूत रिचर्ड मरिस र बेलायती गोर्खा सैनिक सहितको उपस्थिति थियो । राजकुमार ह्यारीले वरको वृक्षसमेत रोपण गरेका थिए । मंगलबार नै राजकुमार ह्यारी काठमाडौं फर्किएका थिए ।