नेपाली सेनाका वीरमान लामा ‘१४औँ राष्ट्रिय पुरुष तौल समूह तथा १३औँ राष्ट्रिय महिला खुला फुलकन्ट्याक्ट कराते प्रतियोगिता– २०७२’ काता खुलातर्फ पहिलो भएका छन् । उनले नगद पाँच हजारसहित मेडल, प्रमाणपत्र र ट्रफी प्राप्त गरेका थिए । दोस्रो भएका सेनाकै सुनिल नगरकोटीले २५ सय र तेस्रो भएका रूपन्देहीका साहिल इराकीले एक हजार प्राप्त गरेका थिए ।

नेपाल क्योकुसिन कराते डो सङ्घको आयोजनामा भएको प्रतियोगिताको महिलातर्फ नेपाली सेनाकी विन्दु पुनमगर पहिलो भइन् । उनले नवलपरासीकी सुजाता राईलाई पराजित गरेकी थिइन् । ललितपुरकी दीपा शाही तेस्रो र सुस्मिता राई चौथो भए । राखेप कभर्डहलमा आयोजित प्रतियोगिताको पुरुष ५० केजी तौलमा सशस्त्रका सञ्जय राई, ललितपुरका समीर तामाङ, नवलपरासीका शक्ति मातिम मगर तथा काठमाडौंका रामकुमार कुसवाहा पहिलो, दोस्रो, तेस्रो र चौथो भएका थिए ।

पुरुषकै ६० केजीमुनि तौलमा ललितपुरका विकेश महर्जनले काठमाडौंका सन्तोषकुमार लामालाई पराजित गर्दै स्वर्ण पदक पाए । तेस्रो स्थानमा नेपाली सेनाका मनोज थपलिया र चौथो स्थानमा कास्कीका गणेश अधिकारी रहे । ६० केजीमाथिको तौल समूहमा मकवानपुरका सनि सिंहले काठमाडौंका कुञ्जन श्रेष्ठलाई पराजित गर्दै प्रथम स्थान प्राप्त गरे । तेस्रो स्थानमा कास्कीका रूपक नेपाली र चौथो स्थानमा काठमाडौंका दिनेश खड्का रहे । पहिलो, दोस्रो, तेस्रो र चौथो हुनेले क्रमश: १० हजार, पाँच हजार, २५ सय र एक हजारसहित मेडल, प्रमाणपत्र र ट्रफी प्राप्त गरे । विजयी खेलाडीलाई राष्ट्रिय खेलकुद परिषद्का सदस्यसचिव केशवकुमार विष्टले पुरस्कार वितरण गरेका थिए ।