प्रधानमन्त्री खड्गप्रसाद ओलीद्वारा सोमबार राति बालुवाटारस्थित आफ्नो निवासस्थानमा दिइएको रात्रिभोज नेता माधवकुमार नेपालसमेत केहीले घोषणा नगरीकन बहिष्कार गरेको जानकारी प्राप्त भएको छ । संसद्मा ऐतिहासिक महत्त्वको वक्तव्य दिई राजीनामाको घोषणा गरेका प्रधानमन्त्री ओलीले गत सोमबार राति मन्त्री तथा तिनका पत्नीहरू, पार्टी स्थायी समितिका सदस्य तथा श्रीमतीहरू, विभिन्न मन्त्रालयका सचिवहरू, योजना आयोगका सदस्य र केही अति निकटका व्यक्तिलाई भोजमा आमन्त्रण गरेका थिए । भोजमा झलनाथ खनाल, वामदेव गौतम, अमृत बोहरा र सुरेन्द्र पाण्डेलगायत उपस्थित थिए । तर, निमन्त्रणा पाएर पनि नेता माधवकुमार नेपाल, घनश्याम भुसाल, गोकर्ण विष्ट र योगेश भट्टराईलगायत माधव नेपालका खासखास समर्थकले भोजमा सहभागिता जनाएनन् । ओलीनिकटका मानिने राजन भट्टराई, भानुभक्त ढकाल र गोकुल बास्कोटा मन्त्री, सचिव या स्थायी समितिका सदस्य नभए पनि भोजमा आमन्त्रित थिए ।

आफूलाई कुनै न कुनै रूपले सहयोग पुर्‍याउनेहरूलाई धन्यवाद दिने उद्देश्यले प्रधानमन्त्रीद्वारा आयोजित भोजमा नेता नेपाल अनुपस्थित रहनुले पार्टीमा मुख्य नेताबीच उत्पन्न दरारको स्पष्ट सङ्केत दिएको छ । त्यसअघि नेता नेपालले आइतबार (साउन ९ गते) संसद्मा सम्बोधन गर्ने क्रममा पनि अविश्वासको प्रस्तावप्रति असहमति जनाउनमा भन्दा बढी प्रधानमन्त्री ओलीको आलोचनामा समय खर्च गरेका थिए । त्यसरी ओलीको आलोचना गरेपछि माधव नेपाललाई पार्टीभित्र आलोचना गर्नेहरूको सङ्ख्या ह्वात्तै बढेको छ ।